কোকৰাঝাৰ,12ছেপ্টেম্বৰঃ আতংকত ভুগিছে সমগ্ৰ কোকৰাঝাৰ চহৰ ৷ এক দুষ্ট চক্ৰৰ টাৰ্গেট হৈ পৰিছে চহৰখনৰ যুৱতী-মহিলাসকল ৷ কিয়নো এই দুষ্ট চক্ৰটোৱে প্ৰথমে ঘৰত অকলে থকা যুৱতী-মহিলাক টাৰ্গেট কৰে ৷ তাৰপাচত ঘৰত কৌশলেৰে প্ৰৱেশ কৰি চেতনানাশক দ্ৰব্য প্ৰয়োগ কৰি অচেতন কৰে ৷ অচেতন কৰাৰ পিছত দুষ্টচক্ৰই অনৈতিক কাৰ্য কৰে আৰু সেই সকলো দৃশ্য ভিডিঅ' ৰেকৰ্ডিং কৰি ছ'চিয়েল মিডিয়াত ভাইৰেল কৰে । ইতিমধ্যে এই দুষ্টচক্ৰটোৰ বলি হৈছে কেইবাগৰাকীও যুৱতী-মহিলা ৷ যাৰ ফলত আতংকময় পৰিবেশ বিৰাজ কৰিছে সমগ্ৰ চহৰখনৰ যুৱতী-মহিলাসকলৰ মাজত ৷
কোকৰাঝাৰৰ যুৱতী-মহিলাসকল সম্প্ৰতি আতংকত ভুগিছে প্ৰাপ্ত খবৰ অনুসৰি কোকৰাঝাৰৰ বাগানশালী, টেঙাপাৰা আদি অঞ্চলত এক দুষ্টচক্ৰই অকলে থকা যুৱতী মহিলা সকলক লক্ষ্য কৰি এক ভয়াৱহ কাণ্ড সংঘটিত কৰি আহিছে । যাৰ ফলত দুষ্টচক্ৰৰ বলি হোৱা পৰিয়ালে সামাজিক গণ লজ্জাৰ সন্মুখীন হৈছে । উল্লেখ্য যে এনে এক অনুৰূপ ঘটনা বুধবাৰে নিশাও সংঘটিত হয় ৷ বুধবাৰে নিশা ঘৰত কোনো পুৰুষ সদস্য নথকাৰ সুযোগ গ্ৰহণ কৰি এক দুষ্টচক্ৰই মাক-জীয়েকক অচেতন কৰি অনৈতিক কাৰ্যৰ ভিডিঅ' ৰেকৰ্ডিং কৰি সেয়া ভাইৰেল কৰাত পৰিয়ালটো সম্প্ৰতি সংকটত পৰিছে । ইপিনে দুষ্টচক্ৰটোৰ এনে অনৈতিক কাৰ্যকলাপৰ বিৰুদ্ধে বৰ্তমানলৈকে কোনো ভুক্তভোগী পৰিয়ালে থানাত গোচৰ ৰজু নকৰাত আৰক্ষীও বিপাঙত পৰিছে ।
সম্প্ৰতি এক আতংকময় পৰিৱেশৰ মাজত কোকৰাঝাৰ সদৰ চহৰৰ যুৱতী -মহিলাসকল দিন অতিবাহিত কৰিবলগীয়া হৈছে ৷ অৱশ্যে ইতিমধ্যে আৰক্ষীয়ে ঘটনা সন্দৰ্ভত নিজাববীয়া তদন্ত অব্যাহত ৰাখিছে ৷
