অন্ধবিশ্বাসৰ কৰাল গ্ৰাসত কোকৰাঝাৰ

অন্ধবিশ্বাসৰ কৰাল গ্ৰাসত কোকৰাঝাৰ ৷ কুঁৱা এটাক আৰম্ভ কৰিছে পূজা-অৰ্চনা , কুঁৱাৰ পানী খাই বেমাৰ আজাৰৰ পৰা মুক্ত হোৱাৰ বাসনা

কোকৰাঝাৰ, 31 জুলাই : কোকৰাঝাৰ আঠীয়াবাৰীৰ প্ৰেমনগৰত থকা এটা কুঁৱা ৷ কুঁৱাটোক পূজা-অৰ্চনা কৰি তাৰ পানী খাই বেমাৰৰ পৰা মুক্তি লাভৰ বাবে লানি নিছিগা সোঁত বৈছে অঞ্চলটোলৈ ৷ ইয়াকে কেন্দ্ৰ কৰি জিলাখনত এতিয়া প্ৰতিক্ৰিয়াৰ সৃষ্টি হৈছে ৷ ঘটনাটো সৃষ্টি হৈছে কোকৰাঝাৰ সদৰ চহৰৰ ৩১ নং ৰাষ্ট্ৰীয় ঘাইপথৰ উত্তৰে আঠীয়াবাৰীৰ প্ৰেমনগৰত এটি সুঁতিৰ মাজত কুঁৱা এটাক কেন্দ্ৰ কৰি ৷ গাঁওবাসীয়ে খোৱাপানীৰ অভাৱ দুৰ কৰিবলৈ উক্ত কুঁৱাটো ১৯৯১ চনতে খান্দিছিল ৷ উক্ত কুৱাটোৰ পৰাই দীৰ্ঘদিন ধৰি পানী খায় আহিছিল গাঁওবাসীয়ে ৷ বাৰিষাৰ সময়ছোৱাত সুঁতিত পানী উপচি পৰা বাবে আন্ত:চাপৰ পৰিণতিতে হওঁক নাইবা কুঁৱাৰ ৰিঙৰ মাজত ফুটা থকাৰ পৰিণতিতে সুঁতিৰ পানী কুঁৱাত সোমাই সেয়া উপচি পৰি কুঁৱাৰ ওপৰেদি পানী ওলাই থাকে । গাঁওবাসীৰ বাবে এয়া তেনেই সাধাৰণ ঘটনা ৷ কিন্তু বাৰিষাৰ সময়ছোৱাত খোৱাপানীক লৈ চিন্তিত গাঁওবাসীয়ে খোৱাপানীৰ সমস্যাক লৈ বাতৰি সম্প্ৰচাৰ কৰাৰ পিছতে হিতে বিপৰীত হ'ল ৷

উক্ত ঘটনাটোৰ দৃশ্য বাতৰি সম্প্ৰচাৰ হোৱাৰ পাছত আজৱ কুঁৱা চাবলৈ দুই এজনকৈ যোৱাৰ পিছত এতিয়া উক্ত ঠাইডোখৰ হৈ পৰিছে লোকে লোকাৰণ্য ৷ এয়া অলৌকিক ঘটনা বা অদৃশ্য শক্তিৰ মহিমা বিশ্বাস কৰি এচাম অন্ধবিশ্বাসী মানুহে কুঁৱাটোত আৰম্ভ কৰিছে পূজা অৰ্চনা ৷ লগতে টকা -পইচা আগবঢ়াই কুঁৱাৰ পানী খাই বেমাৰৰ পৰা আৰোগ্য হোৱাৰ কৰিছে কামনা ৷ তদুপৰি কুঁৱাটোৰ পানী পবিত্ৰ পানী বুলি বটলত ভৰাই লৈ গৈছে আত্মীয় সজ্জ্বনৰ বাবেও ৷ সম্প্ৰতি আৱৰ্জনাৰে দূষিত হৈ পৰিছে নিকা ঠাইডোখৰ । বৰ্তমানেও উক্ত কুঁৱাটো চাবলৈ দুৰ-দুৰণিৰ পৰা মানুহৰ ঘটি আছে অহৰহ সমাগম ৷ এই ঘটনাই আজিৰ সময়তো অন্ধবিশ্বাসত ডুবি থকা সমাজ ব্যৱস্থাকেই প্ৰতিফলিত কৰিছে ৷