শ্ৰীৰামপুৰত জব্দ বৃহৎ পৰিমাণৰ ম’হৰ শিং

শ্ৰীৰামপুৰত বন বিভাগৰ অভিযানত পশ্চিমবংগ অভিমুখী ট্ৰাকৰ পৰা উদ্ধাৰ বৃহৎ পৰিমাণৰ ম’হৰ শিং-হাড় ৷ মণিপুৰৰ পৰা উত্তৰ প্ৰদেশলৈ লৈ যোৱাৰ পৰিকল্পনা কৰিছিল বনৰীয়া ম’হৰ শিং আৰু হাড়খিনি ৷

কোকৰাঝাৰ, 27 নৱেম্বৰঃ কোকৰাঝাৰৰ অসম-বংগ সীমান্তৰ শ্ৰীৰামপুৰত ট্ৰাকৰ পৰা জব্দ ম’হৰ শিং-হাড় ৷ শ্ৰীৰামপুৰত বন বিভাগৰ অভিযানত পশ্চিমবংগ অভিমুখী ট্ৰাকৰ পৰা উদ্ধাৰ বৃহৎ পৰিমাণৰ ম’হৰ শিং-হাড়ৰ লগতে আটক হয় ইয়াৰ লগত জড়িত তিনিজন ব্যক্তি ৷ প্ৰাপ্ত বাতৰি মতে মণিপুৰৰ পৰা ইউ পি 21 চি/এন 1871 নম্বৰৰ দহ চকীয়া ট্ৰাক এখনত বৃহৎ পৰিমাণৰ বনৰীয়া ম’হৰ শিং আৰু হাড় উত্তৰ প্ৰদেশলৈ লৈ যোৱাৰ পৰিকল্পনা কৰিছিল ৷

তথ্যৰ ভিত্তিত কচুগাঁও বন সংমণ্ডলৰ বিষয়া মতিলাল বসুমতাৰীৰ নেতৃত্বত নিশা বন কৰ্মীৰ দল আৰু অসম বন সুৰক্ষা বাহিনীৰ দলে চলোৱা এক অভিযানত শিং-হাড়খিনিৰ লগতে ট্ৰাকখন লৈ অহা তিনিগৰাকী লোকক আটক কৰিবলৈ সক্ষম হয় ৷ ট্ৰাকৰ চালকসহ আটকাধীন লোককেইজন ক্ৰমে উত্তৰ প্ৰদেশৰ নিৱাসী মোঃ নাছিম,আৰবাজ খান,মোঃ জুনাইদ বুলি বন বিভাগে উল্লেখ কৰে ৷

আৰু পঢ়কঃ আভ্যন্তৰীণ জল পৰিৱহন বিভাগত বৃহৎ চিণ্ডিকেট