কোকৰাঝাৰ, 12 নৱেম্বৰ:কোকৰাঝাৰৰ পৰা আৰম্ভ অসম চুক্তিৰ 6 নং দফা ৰূপায়ণৰ প্ৰক্ৰিয়া।মঙলবাৰৰ পৰা আৰম্ভ হৈছে মতামত আৰু পৰামৰ্শ গ্ৰহণ কাৰ্যসূচী ৷ উচ্চ পৰ্যায়ৰ সমিতিয়ে চিৰাং, কোকৰাঝাৰ, গোৱালপাৰা, দক্ষিণ শালমাৰা আৰু বঙাইগাঁও জিলাৰ দল সংগঠন সমুহৰ মতামত আৰু পৰামৰ্শ গ্ৰহণ কৰিব । মঙলবাৰে কোকৰাঝাৰ আৱৰ্ত ভৱনত অনুষ্ঠিত হোৱা বৈঠকত গুৱাহাটী উচ্চ ন্যায়ালয়ৰ প্ৰাক্তন ন্যায়াধীশ বি. কে শৰ্মা, প্ৰাক্তন মুখ্য সচিব সুবাস দাস, মহাধিবক্তা ৰমেশ বৰপাত্ৰ গোহাঁই, আছুৰ মুখ্য উপদেষ্টা সমুজ্জল ভট্টাচাৰ্য, সাধাৰণ সম্পাদক লুৰিণজ্যোতি গগৈ উপস্থিত থাকে ।
অসম চুক্তিৰ 6 নং দফা ৰূপায়ণ আছুৰ মুখ্য উপদেষ্টা সমুজ্জল ভট্টাচাৰ্যই সাংবাদিকক জানিবলৈ দিয়ে যে, গুৱাহাটীত জ্যেষ্ঠ সাংবাদিক, কাকত, চেনেলৰ সম্পাদকৰ লগত অসম চুক্তি 6 নং দফা কাৰ্যকৰীকৰণ সন্দৰ্ভত মতামত আৰু পৰামৰ্শ গ্ৰহণ কৰাৰ পিছত মঙলবাৰৰ পৰা পোন প্ৰথমবাৰৰ বাবে কোকৰাঝাৰত উপস্থিত হৈ 6 নং দফা কাৰ্যকৰীকৰণ সন্দৰ্ভত মতামত আৰু পৰামৰ্শ গ্ৰহণ কৰা হৈছে । এই ক্ষেত্ৰত উচ্চ পৰ্যায়ৰ সমিতিয়ে সকলোৰে পদক্ষেপ আৰু পৰামৰ্শ লৈ আগবাঢ়ি গৈছে ।
অসমীয়া মানুহৰ সংস্কৃতি, সামাজিক আৰু ভাষিক পৰিচয় আৰু ঐতিহ্য ৰক্ষা, সংৰক্ষণ আৰু বিকাশৰ বাবে যথোচিত সাংবিধানিক, আইনগত আৰু প্ৰশাসনীয় ৰক্ষাকৱচ দিয়াৰ আঁত ধৰি খিলঞ্জীয়া জনজাতি আৰু খিলঞ্জীয়া অসমীয়াৰ বাবে উচ্চ পৰ্যায়ৰ সমিতিয়ে বিভিন্ন দল- সংগঠনৰ প্ৰতিনিধি আৰু বিশিষ্ট ব্যক্তিৰ পৰা মতামত পৰামৰ্শ গ্ৰহণ কৰে ।
