তুংগত বিটিচিৰ নতুন কাৰ্যবাহী পৰিষদৰ শপত গ্ৰহণ অনুষ্ঠানৰ প্ৰস্তুতি

বিটিচিৰ নতুন কাৰ্যবাহী পৰিষদৰ শপত গ্ৰহণ অনুষ্ঠানৰ বাবে ইতিমধ্যে প্ৰশাসনৰ মাজত পৰিলক্ষিত হৈছে ব্যাপক তৎপৰতা ৷ যুদ্ধকালীন তৎপৰতাৰে আৰম্ভ হৈছে অনুষ্ঠানৰ প্ৰস্তুতিৰ প্ৰক্ৰিয়া ৷

কোকৰাঝাৰ, 14 ডিচেম্বৰ : বহু জল্পনা-কল্পনাৰ অন্তত 15 ডিচেম্বৰৰ দিনটোত শপত গ্ৰহণ কৰিব বিটিচিৰ নতুন কাৰ্যবাহী পৰিষদে ৷ বিটিচি সচিবালয়ৰ নিকটৱৰ্তী গ্ৰীণ ফিল্ডত অনুষ্ঠিত হ'ব শপত গ্ৰহণ অনুষ্ঠান ৷ শপত গ্ৰহণ অনুষ্ঠানৰ বাবে ইতিমধ্যে প্ৰশাসনৰ মাজত পৰিলক্ষিত হৈছে ব্যাপক তৎপৰতা ৷ যুদ্ধকালীন তৎপৰতাৰে অনুষ্ঠানস্থলী সাজু কৰি তোলাৰ প্ৰক্ৰিয়া আৰম্ভ হৈছে ৷

জানিব পৰা মতে, মঙলবাৰে অনুষ্ঠিত হ'বলগীয়া শপত গ্ৰহণ অনু্ষ্ঠানত প্ৰায় 1 লাখ লোক উপস্থিত থাকিব ৷ বিটিচিৰ প্ৰধান সচিব সিদ্ধাৰ্থ সিঙে নিৰাপত্তা ব্যৱস্থাৰ তদাৰক কৰিছে ৷ জনসাধাৰণে যাতে কোনো ধৰণৰ সমস্যাৰ সন্মুখীন নহয় তাৰ প্ৰতিও গুৰুত্ব আৰোপ কৰিছে সচিব গৰাকীয়ে ৷ তাৰোপৰি অনুষ্ঠানটো সম্পূৰ্ণ ক'ভিড প্ৰট'কলৰ মাজেৰে অনুষ্ঠিত কৰা হ'ব বুলিও জানিবলৈ দিয়ে তেওঁ ৷

ইফালে ৰাজ্যসভাৰ প্ৰাক্তন সাংসদ তথা বিজেপি নেতা বিশ্বজিৎ দৈমাৰীয়ে বিপিএফৰ সাংগঠনিক স্থিতি ঠিকে ৰাখিব নোৱাৰিলে বিপিএফৰ বহু সংখ্যক নিৰ্বাচিত সদস্যই বিজেপি বা ইউপিপিএলত যোগ দিব বুলি মন্তব্য কৰে ৷ কেইবাগৰাকীও লোকে ইতিমধ্যে তেওঁৰ সৈতে যোগাযোগ কৰা বুলিও জানিবলৈ দিয়ে নেতাগৰাকীয়ে ৷ আনহাতে হাগ্ৰামা মহিলাৰীয়ে শপত গ্ৰহণ অনুষ্ঠানত উপস্থিত থাকি ভিভাৱক হিচাপে প্ৰমোদ বড়োক আশীৰ্বাদ দিব বুলিও আশা প্ৰকাশ কৰিছে বিশ্বজিৎ দৈমাৰীয়ে ৷ উল্লেখ্য যে, শপত গ্ৰহণ অনুষ্ঠানত মুখ্যমন্ত্ৰী সৰ্বানন্দ সোণোৱাল, ৰাজ্যিক বিজেপিৰ সভাপতি ৰণজিৎ দাস, নেডাৰ আহ্বায়ক হিমন্ত বিশ্ব শৰ্মা, বিজেপিৰ ৰাষ্ট্ৰীয় সাধাৰণ সম্পাদক দিলীপ শইকীয়াকে বহু কেইগৰাকী নেতা উপস্থিত থাকিব ৷

লগতে পঢ়ক:শিল্পী মনোজ বড়াৰ অগপত যোগদান