কোকৰাঝাৰ, ১৩ জুন: বালাজান তিনালীৰ দূৰ্গা মন্দিৰ প্ৰাংগনত অনুষ্ঠিত হয় বালাজান তিনালী ব্যৱসায়ী সন্থাৰ দ্বি-বাৰ্ষিক প্ৰতিষ্ঠা দিৱস । কোকৰাঝাৰ জিলাৰ বালাজান তিনালী ব্যৱসায়ী সন্থাৰ দ্বিতীয় বাৰ্ষিক প্ৰতিষ্ঠা দিৱসৰ কাৰ্যসূচী অনুযায়ী অনুষ্ঠিত হয় এখন মুকলি সভা । উক্ত মুকলি সভাত উপস্থিত থাকে পূব কোকৰাঝাৰ বিধানসভা সমষ্টিৰ বিধায়ক লৰেঞ্চ ইছলাৰী(Lorence Islary present on annual foundation day of Balajan Tinali Traders Association) ।
মুকলি সভাত মুখ্য অতিথি হিচাপে উপস্থিত থাকি ইছলাৰীয়ে কেতবোৰ গুৰুত্বপূৰ্ণ মন্তব্য কৰা পৰিলক্ষিত হয় । তেওঁ কয় যে ব্যৱসায়ীসকল হ'ল সমাজ তথা দেশৰ অন্যতম চালিকা শক্তি । তেওঁলোক সমস্যাত জৰ্জৰিত হলে তাৰ প্ৰভাৱ সকলোতে পৰে । সেয়ে ব্যৱসায়ীৰ সমস্যা সোনকালে সমাধান কৰা উচিত ।
লগতে বিধায়কগৰাকীয়ে নিজ ভাষণ প্ৰসংগত কয় যে ব্যৱসায়ীসকলৰ লগতে বৃহত্তৰ বালাজান তিনালী অঞ্চলৰ প্ৰতিটো সমস্যা সমাধানত তেওঁ গুৰুত্ব আৰোপ কৰিছে । নিকা আৰু সৎ হলেহে সফল ব্যৱসায়ী হিচাপে প্ৰতিষ্ঠা লাভ কৰিব পাৰি । এখন ভাল বজাৰে একোটা অঞ্চলৰ ভেটি শক্তিশালী কৰিব পাৰে বুলি উল্লেখ কৰে বিধায়ক গৰাকীয়ে ।