কোকৰাঝাৰত বৃহৎ পৰিমাণৰ মাৰণাস্ত্ৰ উদ্ধাৰ

কোকৰাঝাৰ আৰক্ষীৰ অভিযানত উদ্ধাৰ কিছু পৰিমাণৰ মাৰণাস্ত্ৰ ৷ জিলাখনৰ বিশমুৰী বনাঞ্চলত মাটিত পুতি থোৱা অৱস্থাত উদ্ধাৰ মাৰণাস্ত্ৰখিনি ৷ আৰক্ষীৰ অভিযানত উদ্ধাৰ হৈছে এ কে 47 ৰ দুটা ৰাইফল, দুটা গ্ৰেণেড, এ কে 47 ৰ এটা মেগজিন আৰু 7.65 এম এমৰ 9 জাঁই সজীৱ গুলি ৷

কোকৰাঝাৰ,31 ডিচেম্বৰ:বছৰৰ অন্তিমটো দিনত কোকৰাঝাৰ আৰক্ষীৰ সফল অভিযান ৷ কোকৰাঝাৰ আৰক্ষীয়ে গোপন সূত্ৰৰ তথ্যৰ ভিত্তিত চলোৱা এক অভিযানত উদ্ধাৰ হৈছে কিছু পৰিমাণৰ অত্যাধুনিক মাৰণাস্ত্ৰ ৷ এই ঘটনাই সমগ্ৰ জিলাখনত সৃষ্টি কৰিছে চাঞ্চল্যৰ ৷ পূৰ্বেও বিটিআৰৰ অধীনষ্ঠ বহু এলেকাত সময়ে সময়ে উদ্ধাৰ হৈছিল মাৰণাস্ত্ৰ ৷ বুধবাৰে নিশা বিশমূৰী উপ-আৰক্ষী চকীৰ অন্তৰ্গত বিশমূৰী বনাঞ্চলত অভিযান চলাই আৰক্ষীৰ এটা দলে উদ্ধাৰ কৰে মাৰণাস্ত্ৰসমূহ ৷ আৰক্ষীয়ে উদ্ধাৰ কৰা মাৰণাস্ত্ৰসমূহৰ ভিতৰত আছে- এ কে 47 ৰ দুটা ৰাইফল, দুটা গ্ৰেণেড, এ কে 47 ৰ এটা মেগজিন আৰু 7.65 এম এমৰ 9 জাঁই সজীৱ গুলি ৷

বৃহস্পতিবাৰে আয়োজিত এক সংবাদমেলত জিলা অতিৰিক্ত আৰক্ষী অধীক্ষক মুকুট ৰাভাই সদৰী কৰা মতে, এক গোপন সূত্ৰৰ তথ্যৰ ভিত্তিত বুধবাৰে নিশা কোকৰাঝাৰ আৰু বিশমূৰী আৰক্ষীয়ে যৌথভাৱে এই অভিযান চলাইছিল ৷ প্ৰায় 4 ঘণ্টা যোৰা এই অভিযানৰ পিছত আৰক্ষীয়ে এজোপা গছৰ তলৰ পৰা পুতি থোৱা অৱস্থাত উদ্ধাৰ কৰে মাৰণাস্ত্ৰসমূহ ৷ উদ্ধাৰ হোৱা মাৰণাস্ত্ৰসমূহৰ সন্দৰ্ভত আন কোনো তথ্য সদৰী কৰা নাই আৰক্ষীয়ে ৷ জিলাখনৰ অতিৰিক্ত আৰক্ষী অধীক্ষকগৰাকীয়ে ঘটনা সন্দৰ্ভত এক গোচৰ ৰুজু কৰি ঘটনাৰ তদন্ত অব্যাহত থকা বুলি সংবাদমেলখনত সদৰী কৰে ৷

লগতে পঢ়ক :বৰপেটাত ককায়েকে হানি-খুচি হত্যা কৰিলে দুই ভাতৃক