বৰমা ২৭ মাৰ্চঃ কোনো ইছ্যু নাই বাবে হাগ্ৰামা মহিলাৰীয়ে প্ৰমোদ বড়োক টাৰ্গেট কৰি লৈছে বুলি অভিযোগ প্ৰমোদ বড়োৰ ৷ এবছুৰ সভাপতিগৰাকীয়ে কয় যে হাগ্ৰামা মহিলাৰীয়ে এবছু অথবা প্ৰমোদ বড়োক গালি পাৰি কোনো লাভ নাই।ইয়াৰ দ্বাৰা সমাজ বা হাগ্ৰামাৰ কোনো লাভ নহয় ৷ কাৰণ প্ৰমোদ বড়োৰ কোনো দীঘলীয়া অতীত নাই ৷ কিন্তু হাগ্ৰামা মহিলাৰীৰ অতীত খুঁচৰিলে বহুত কিবাকিবি ওলাব।
মুছলপুৰত এক সংবাদমেলত হাগ্ৰামা মহিলাৰীয়ে এন ডি এফ বি (প্ৰ)ৰ সৈতে লগলাগি এবছুৱে শাল গছ কাটি নিৰ্বাচনৰ বাবে টকা সংগ্ৰহ কৰা বুলি যি অভিযোগ আনিছে সেয়া হাস্যকৰ আৰু ভিত্তিহীন বুলি মন্তব্য কৰে প্ৰমোদ বড়োৱে ৷ বড়োৱে ওলোটাই হাগ্ৰামা মহিলাৰীয়েহেএকাংশ সহযোগীৰলগত অবৈধভাৱে বি টি এ ডিৰ বিভিন্ন অঞ্চলত কাঠ মিল, শিল ভঙা মিল চলাই আছে বুলি অভিযোগ কৰে । তেওঁ লগতে কয় যে হাগ্ৰামা মহিলাৰীয়ে জনসমাজত এবছুক হেয় প্ৰতিপন্ন কৰাৰ বাবে আবোল-তাবোল বকিছে ৷ ৰাজনীতিৰ বাবে সমাজক বিপথে পৰিচালিত কৰিবলৈ প্ৰমোদ বড়ো আৰু এবছুক টাৰ্গেট কৰি লৈছে ৷ কিন্তু ইয়াৰ দ্বাৰা হাগ্ৰামাৰ কোনো লাভ নহ'ব ৷ প্ৰমোদ বড়োক গালি পাৰিলে হাগ্ৰামাৰ এটা ভোটও নাবাঢ়ে বুলি কয় এবছুৰ সভাপতিগৰাকীয়ে ৷