কোকৰাঝাৰত ১৭ সংখ্যক বড়োলেণ্ড দিৱস উদযাপন

বিটিচি চুক্তিৰ ৯০ শতাংশ দফা কাৰ্যকাৰী হৈছে : হাগ্ৰামা

কোকৰাঝাৰ,১০ফেব্ৰুৱাৰী: ২০০৩ চনৰ ১০ ফেব্ৰুৱাৰীত হোৱা ঐতিহাসিক বি টি চি চুক্তিয়ে দেওবাৰে ১৭ বছৰ পূৰ্ণ কৰিলে। প্ৰতিবছৰে বি টি চি চৰকাৰৰ সহযোগত বদফা নগৰত অনুষ্ঠিত কৰা বড়োলেণ্ড দিৱস এইবেলিও জাকজমকতাৰে পালন কৰা হয়।

এই অনুষ্ঠানৰ প্ৰথমটো কাৰ্যসূচীত দেৱৰগাঁওস্থীত শ্বহীদ উদ্যানত পুৱা শ্বহীদৰ প্ৰতি শ্ৰদ্ধাঞ্জলি জ্ঞাপন কৰে বিটিচি প্ৰধান হাগ্ৰামা মহিলাৰীয়ে। লগতে মহিলাৰীয়ে সংবাদমাধ্যমৰ আগত শ্বহীদৰ মহান ত্যাগক শ্ৰদ্ধাৰে সোঁৱৰণ কৰি বিটিচি চুক্তিৰ ৯০ শতাংশ দফাই কাৰ্যকাৰী হোৱা বুলি মন্তব্য কৰে । অসম চৰকাৰৰ তৰফৰ পৰা বড়োলেণ্ড আন্দোলনৰ শ্বহীদৰ পৰিয়ালক পাঁচ লাখকৈ আৰ্থিক সাহাৰ্য প্ৰদান কৰা বাবে অসম চৰকাৰ আৰু সৰ্বানন্দ সোণোৱালকো হাগ্ৰামা মহিলাৰীয়ে ধন্যবাদ জ্ঞাপন কৰে ।

ইপিনে এই বড়োলেণ্ড দিৱসৰ মুকলি সভাত মুখ্যমন্ত্ৰী সৰ্বানন্দ সোনোৱালে অংশ লৈ অসমৰ সকলো দিশ- শিক্ষা, স্বাস্থ্য, পৰ্যটনকে ধৰি বহুকেইটা দিশত অগবাঢ়ি যোৱাৰ প্ৰসংগত মত প্ৰকাশ কৰে । তেওঁ লগতে বিশ্ব বিনিয়োগ সন্মিলনৰ চুক্তিসমূহো কাৰ্যক্ষেত্ৰত পৰিণত হোৱা বুলি মন্তব্য কৰে ।

উল্লেখ্য যে এই অনুষ্ঠানত বিটিচি প্ৰধানৰ ওপৰি সাংসদ বিশ্বজিত দৈমাৰী, মন্ত্ৰী চন্দন ব্ৰহ্ম, প্ৰমিলা ৰাণী ব্ৰহ্মকে ধৰি বিটিচিৰ বহুকেইজন বিষয়-ববিয়া আৰু বড়োলেণ্ডৰ শ্বহীদৰ পৰিয়ালবৰ্গ উপস্থিত থাকে ।