NIT Moral Policing : NIT ছাত্ৰৰ দলবদ্ধ আক্ৰমণত গুৰুতৰভাৱে আহত তিনি ৰান্ধনী

শিলচৰ NIT ত ছাত্ৰৰ মৰেল পুলিচিং ৷ ম’বাইল চুৰিৰ অভিযোগত NIT ৰ তিনি ৰান্ধনীক দলবদ্ধ আক্ৰমণ কৰে একাংশ ছাত্ৰই ৷ ছাত্ৰৰ দলবদ্ধ আক্ৰমণত আহত হৈ বৰ্তমানো শিলচৰ মেডিকেল কলেজত ভৰ্তি এজন । ঘটনাক কেন্দ্ৰ কৰি সৰ্বত্ৰে সৃষ্টি হৈছে তীব্ৰ প্ৰতিক্ৰিয়াৰ ৷

হাফলং, 29 জুলাই : ৰাজ্যত পুনৰ পোহৰলৈ আহিছে মৰেল পুলিচিঙৰ ঘটনা ৷ এইবাৰৰ স্থান শিলচৰ NIT ৷ ম’বাইল চুৰিৰ অভিযোগত NIT ৰ তিনি ৰান্ধনীক দলবদ্ধ আক্ৰমণ কৰে গুণ্ডাৰূপী একাংশ ছাত্ৰই । গুণ্ডাৰূপী একাংশ ছাত্ৰৰ দলবদ্ধ আক্ৰমণত গুৰুতৰভাৱে আহত হৈছে তিনি ৰান্ধনী ৷ মাৰপিটৰ সমগ্ৰ ঘটনা ভাইৰেল হৈ পৰিছে ছ’চিয়েল মিডিয়াত ৷ এই ভিডিঅ’ ভাইৰেল হোৱাৰ পাচতে এতিয়া সৰ্বত্ৰে সৃষ্টি হৈছে তীব্ৰ প্ৰতিক্ৰিয়াৰ ৷

জানিব পৰা মতে, বুধবাৰৰ নিশা শিলচৰ NIT ৰ 9 নং হোষ্টেলত সংঘটিত হৈছে এই ঘটনা । NIT ৰ 4 নং হোষ্টেলৰ এগৰাকী ছাত্ৰৰ ম’বাইল চুৰিৰ অভিযোগত NIT ৰ একাংশ ছাত্ৰই বিকি ৰি, মনা দাস আৰু দৰ্পণ ৰাজকুমাৰ নামৰ NIT ৰ তিনিজন ৰান্ধনীক আটক কৰে । তিনি ৰান্ধনীক গাড়ী তুলি NIT ৰ 9 নং হোষ্টেলত লৈ যায় উপস্থিত ছাত্ৰ দলটোৱে । তাৰ পাচত সেই স্থানত তিনি ৰান্ধনীক দলবদ্ধভাৱে আক্ৰমণ আৰম্ভ কৰে গুণ্ডাৰূপী ছাত্ৰৰ দলটোৱে ।

একাংশ ছাত্ৰৰ দলবদ্ধ আক্ৰমণত গুৰুতৰ আহত হয় তিনি ৰান্ধনি । পৰৱৰ্তী পৰ্যায়ত আহত তিনিগৰাকী ৰান্ধনীকে অতি সংকটজনক অৱস্থাত শিলচৰ মেডিকেল কলেজত লৈ যোৱা হয় ৷ প্ৰাথমিক চিকিৎসাৰ অন্তত বিকি ৰি আৰু মনা দাসক চিকিৎসকে চিকিৎসালয়ৰ পৰা অব্যাহতি দিয়ে ৷ কিন্তু দৰ্পণ ৰাজকুমাৰৰ অৱস্থা কিছু অৱনতি ঘটাত তেওঁক হাস্পতালতে ভৰ্তি কৰা হয় । বৰ্তমান তেওঁ শিলচৰ চিকিৎসা মহাবিদ্যালয়তে চিকিৎসাধীন হৈ আছে ।

ইতিমধ্যে এই ঘটনা সন্দৰ্ভত থানত এজাহাৰ দাখিল কৰা হৈছে । এই ঘটনা সন্দৰ্ভত এতিয়া বিভিন্নজনে ব্যক্ত কৰিছে নিজৰ প্ৰতিক্ৰিয়া ৷

লগতে পঢ়ক :Goalpara Moral Policing: গোৱালপাৰাত মৰেল পুলিচিং; যুৱকক বিদ্যুতৰ খুঁটাত বান্ধি মৰিয়াই মৰিয়াই হত্যা