কৰিমগঞ্জ, 16 চেপ্তেম্বৰঃসোমবাৰে পুৱা কৰিমগঞ্জৰ বাটইয়া অঞ্চলৰ লস্কৰবাৰী এলেকাত স্থানীয় ৰাইজে অপহৰণৰ অভিযোগত দুজন লোকক আটক কৰে ৷ ৰাইজৰ অভিযোগ অনুসৰি তিনিজনীয়া যুৱকৰ দল এটাই দুটি কণমানি শিশুক বলপূৰ্বকভাৱে এখন টেম্প বাহনত তুলি নিয়াৰ চেষ্টা কৰে ৷ এই দৃশ্য দেখা পাই স্থানীয় মাছমৰীয়া লোকসকলৰ সন্দেহ ওপজাত তেওঁলোকে যুৱক কেইজনক আটক কৰে ৷ কিন্তু তিনিজনীয়া দলটোৰ পৰা এজন যুৱকে পলায়ন কৰিবলৈ সক্ষম হয় ৷
আটকাধীন যুৱক দুজন ৰাজু দে আৰু জাবেদ আহমেদ বুলি জানিব পৰা গৈছে ৷ আৰু পলায়ন কৰা যুৱকজনৰ নাম চামিম আহমেদ ৷ ইপিনে অপহৰণকাৰী আটক হোৱাৰ খবৰ বিয়পি পৰাৰ লগে লগে ঘটনাস্থলীত উত্তপ্ত পৰিস্থিতিৰ সৃষ্টি হৈ পৰে। একাংশ উত্তেজিত ৰাইজে টেম্প' খন ভাঙি চূৰমাৰ কৰাৰ লগতে দুই আটকাধীন যুৱকক গণপ্ৰহাৰ কৰে । অৱশ্যে ঘটনাস্থলীত আৰক্ষী উপস্থিত হোৱাত পৰিস্থিতি নিয়ন্ত্ৰণলৈ আহে । আৰু দুই আটকাধীন যুৱকক আৰক্ষীয়ে নিজৰ জিম্মাত লয় ৷ উল্লেখ্য যে যোৱা সপ্তাহতো একে এলেকাত অপহৰণকাৰীৰ এটা দলে আন এগৰাকী শিশুক অপহৰণৰ চেষ্টা চলাইছিল যদিও ৰাইজৰ তৎপৰতাত বিফল হৈছিল দলটো।
