গৰু চুৰিৰ পিছত বাহনত অগ্নিসংযোগ বাংলাদেশী দূৰ্বৃত্তই

কৰিমগঞ্জৰ ভাৰত-বাংলাদেশ সীমান্তত প্ৰায়ে সংঘটিত হয় গৰু চুৰিৰ ঘটনা ৷ শেহতীয়াকৈ সোমবাৰে নিশা সাফালা গাঁৱৰ দক্ষিণ নান্দিদ্ৰামত চোৰে গৰু চুৰ কৰিবলৈ আহি চুৰি কৰাৰ লগতে তিনিখনকৈ বাহনত অগ্নি সংযোগ কৰে ৷ চুবুৰীয়া দেশ বাংলাদেশৰ দুৰ্বৃত্তই এই ঘটনা সংঘটিত কৰাৰ সন্দেহ প্ৰকাশ কৰিছে স্থানীয় ৰাইজে ৷

কৰিমগঞ্জ, 29 জুন : কৰিমগঞ্জৰ ভাৰত-বাংলাদেশ সীমান্ত(Indo-Bangladesh border)ত সংঘটিত হৈছে এক ভয়ংকৰ ঘটনা । গৰু চুৰি কৰাৰ পিছত দুর্বৃত্তই জ্বলাই দিছে তিনিখনকৈ বাহন । উত্তৰ কৰিমগঞ্জ সমষ্টি(North Karimganj LAC)ৰ সাফালা গাঁৱৰ দক্ষিণ নান্দিদ্ৰামত সোমবাৰে নিশা সংঘটিত হৈছে এই ঘটনা । সম্প্ৰতি স্থানীয় ৰাইজে, চুবুৰীয়া দেশ বাংলাদেশৰ দুৰ্বৃত্তই এই ঘটনা সংঘটিত কৰাৰ সন্দেহ প্ৰকাশ কৰিছে ৷

ঘটনা অনুসৰি, সোমবাৰে সাফালা গাঁৱৰ মকলিছুৰ ৰহমানৰ ঘৰৰ পৰা এজনী গাই গৰুৰ সৈতে এটা পোৱালি গৰু চুৰি হৈছিল ৷ একে সময়তে চুবুৰীয়া আশুক উদ্দিনৰ ঘৰত এখন অট’ৰিক্সা জ্বলি থকাৰ উমান পাই গাঁৱৰ ৰাইজ ঘৰৰ বাহিৰলৈ ওলালত সম্পূৰ্ণ ঘটনা পোহৰলৈ আহে ৷ মকলিছুৰ ৰহমানৰ গৰু চুৰিৰ উপৰিও দুৰ্বৃত্তই অগ্নিসংযোগ কৰিছিল দুখন মটৰ চাইকেল আৰু এখন অট’ৰিক্সাত ।

দুৰ্বৃত্তই এইদৰে অগ্নিসংযোগ কৰি থৈ যোৱা বাহনকেইখনৰ গৰাকী আছিল মকলিছুৰ ৰহমান আৰু তেওঁৰ চুবুৰীয়া আশুক উদ্দিন ৷

সম্প্ৰতি এই ঘটনাৰ বাবে সমগ্ৰ অঞ্চলটোত চেপা উত্তেজনা বিৰাজ কৰিছে ৷ এনে ঘটনাৰ পাছত গাঁৱৰ ৰাইজ একগোট হৈ এতিয়া আৰক্ষীৰ দ্বাৰস্থ হৈছে ৷ স্থানীয় ৰাইজৰ অভিযোগ অনুসৰি, বাংলাদেশী দুৰ্বৃত্তই পূৰ্বেও এনে ঘটনা সংঘটিত কৰিছিল ৷ গাঁৱবাসীয়ে জনাইছে যে, কিছুদিন পূৰ্বেও গাঁৱৰ ৰাইজে চুৰ কৰিবলৈ অহা এগৰাকী বাংলাদেশী নাগৰিকক আটক কৰি আৰক্ষীক গতাই দিছিল ৷

পূৰ্বতে বাংলাদেশী নাগৰিকক আৰক্ষীৰ হাতত গতাই দিয়াৰ ঘটনাৰ বাবে দুৰ্বৃত্তই সোমবাৰে নিশা যান-বাহনত অগ্নিসংযোগ কৰা ঘটনা সংঘটিত কৰিব পাৰে বুলি অনুমান কৰিছে গাঁওখনৰ একাংশ ৰাইজে ৷ সীমান্তৰ কাইটীয়া তাঁৰৰ বেৰ পাৰ হৈ কেনেকৈ বাংলাদেশী দুৰ্বৃত্তই ভাৰতত সোমাই তাণ্ডব চলায়, এয়া লৈ প্ৰশ্ন উত্থাপন কৰে এলেকাটোৰ ৰাইজে ৷

লগতে পঢ়ক :প্ৰসংগ APSC কেলেংকাৰী: প্ৰাক্তন DIGৰ পুত্ৰ, সাংবাদিকৰ আত্মীয়ক তলব