কৰিমগঞ্জ, 19 আগষ্ট: কৰিমগঞ্জৰ নিভিয়াৰ ভূতৰপূল এলেকাত নিশা কোনো দুৰ্বৃত্তই সংঘটিত কৰে গুলীচালনা ৷ ৰাইজে গুলীচালনাত জড়িত থকাৰ অভিযোগত চাহাব উদ্দিন নামৰ এজন অভিযুক্ত চুপাৰি কিলাৰক গুৰুতৰভাৱে প্ৰহাৰ কৰে ৷ আটকাধীন চুপাৰি কিলাৰ চাহাব উদ্দিনৰ পৰা ৰাইজে উদ্ধাৰ কৰে এটা পিষ্টল ৷ অভিযুক্ত চাহাব উদ্দিনে সংবাদ মাধ্যমৰ আগত খুলি ক'লে এগৰাকী লোকক হত্যাৰ বাবদ সিহঁতে কিমান টকাৰ চুপাৰি লয়, কোনে সিহঁতক পিষ্টলৰ যোগান ধৰে আদিৰ দৰে গোপন কথা ৷
আটকাধীন লোকজনে উল্লেখ কৰা অনুসৰি, কৰিমগঞ্জ জিলাৰ ৰাতাবাৰী বিধানসভাৰ কিছুমান অঞ্চলত চলে কেতবোৰ অসামাজিক কাম ৷ অসামাজিক কামৰ বিৰুদ্ধে যদি কোনোৱে মাত মাতে তেন্তে ইজনে সিজনৰ বিৰুদ্ধে ব্যবসায়িক শত্ৰুতাৰ বাবে চুপাৰি কিলাৰৰ দ্বাৰা হত্যাৰ যড়যন্ত্ৰ কৰে বুলি অভিযোগ উত্থাপন কৰে ৷
কৰিমগঞ্জত আটক অভিযুক্ত চুপাৰি কিলাৰ অভিযোগ অনুসৰি, নিভিয়াৰ জালালাবাদ এলেকাৰ জনৈক ইমাম উদ্দিন নামৰ লোকগৰাকীৰ সৈতে থকা ব্যবসায়িক শত্ৰুতাৰ বাবে, আত্মীয় নেনা ওৰফে চুফিয়ান আহমদে লৈ আহে চুপাৰি কিলাৰ ৷ অভিযুক্ত চুপাৰি কিলাৰ চাহাব উদ্দিনে উল্লেখ কৰা অনুসৰি, নেনাই আত্মীয় ইমাম উদ্দিনক হত্যাৰ বাবে অভিযুক্ত জনক প্ৰদান কৰিছিল ডেৰ লাখ টকাৰ চুপাৰি ৷ প্ৰয়োজন হ'লে পিষ্টল দিব বুলিও নেনাই অভিযুক্তক কৈছিল বুলি অভিযোগ কৰিছে ৷
পৰিকল্পনামতে নিশা ভূতৰপূল এলেকাত চাহাব উদ্দিনৰ দলে ইমাম উদ্দিনক লক্ষ্য কৰি এক ৰাউণ্ড গুলী নিক্ষেপ কৰিছিল যদিও, গুলী লগা নাছিল ইমাম উদ্দিনৰ শৰীৰত ৷ তেনে সময়তে ইমাম উদ্দিন নামৰ লোকগৰাকীয়ে চিঞৰ-বাখৰ কৰাত গাঁৱৰ লোক ওলাই আহি অভিযুক্ত চাহাব উদ্দিনক আটক কৰি প্ৰহাৰ কৰে ৷ কিন্তু পলাবলৈ সক্ষম হয় আটকাধীন অভিযুক্ত জনৰ লগত অহা আন কেইগৰাকী লোক ৷ ৰাইজৰ প্ৰহাৰত গুৰুতৰভাৱে আহত চাহাব উদ্দিনক পৰৱৰ্তী সময়ত কৰিমগঞ্জ অসামৰিক চিকিৎসালয়ত ভৰ্তি কৰোৱা হয় ৷
লগতে পঢ়ক:জুৰীয়াত বন কৰ্মীক আক্ৰমণ চোৰাং মাছমৰীয়াৰ
