কৰিমগঞ্জত চাঞ্চল্যকৰ ডকাইতি কাণ্ড

কৰিমগঞ্জ জিলাৰ নিলামবজাৰ এচ.ভি বিদ্যানিকেতন হাইস্কুলৰ প্ৰাক্তন অধ্যক্ষ ইয়াছিন আলিৰ বাসগৃহৰ পৰা ছয়জনীয়া ডকাইতৰ দলে পৰিয়ালটিক মাৰণাস্ত্ৰ দেখুৱাই লুটি নিলে নগদ ধন সহ সোণৰ আ-অলংকাৰ ৷

কৰিমগঞ্জ,26 অক্টোবৰ : শুকুৰবাৰে নিশা কৰিমগঞ্জ জিলাৰ গান্ধাই দাসগ্ৰাম গাঁৱত সংঘটিত হয় চাঞ্চল্যকৰ ডকাইতিৰ ঘটনা ৷ গাঁওখনৰ বাসিন্দা ইয়াছিন আলি নামৰ এগৰাকী প্ৰাক্তন অধ্যক্ষৰ ঘৰত প্ৰৱেশ কৰে 6 জনীয়া এটা ডকাইতৰ দলে ৷ ডকাইতৰ দলটোৱে পৰিয়ালটিক ভয়-ভাবুকি দেখুৱাই লুটি নিয়ে নগদ ধনৰ লগতে সোণৰ আ-অলংকাৰ ৷

ডকাইতৰ দলটোৱে নিলামবজাৰ এচ.ভি বিদ্যানিকেতন হাইস্কুলৰ প্ৰাক্তন অধ্যক্ষ ইয়াছিন আলিৰ বাসগৃহৰ দুৱাৰ ভাঙি প্ৰৱেশ কৰিছিল ৷ ইয়াছিন আলিৰ পৰিয়ালে প্ৰকাশ কৰা অনুসৰি,ডকাইতৰ দলটোৰ হাতত আছিল চোকা অস্ত্ৰ সহ এটা AK 47 ৰাইফল ৷ ডকাইতৰ দলটোৱে প্ৰাক্তন অধ্যক্ষগৰাকীৰ মূৰত আঘাত কৰি পৰিয়ালৰ আন সদস্যসকলক বান্ধি থৈছিল ৷ পৰিয়ালৰ অন্য়ান্য সদস্য় সকলে প্ৰাণে মৰাৰ ভয়ত বহু চিঞৰ-বাখৰ কৰিছিল যদিও ঘটনাটো নিশা সংঘটিত হোৱাৰ বাবে অঞ্চলটোৰ আন কোনো লোকে ঘটনা সন্দৰ্ভত অৱগত হ'ব পৰা নাছিল ৷ ইতিমধ্যেই নিলামবজাৰ আৰক্ষীৰ দল ঘটনাস্থলীত উপস্থিত হৈ অব্যাহত ৰাখিছে তদন্ত ৷ ইফালে, এই ঘটনা সংঘটিত হোৱাৰ পাছতেই অঞ্চলবাসী আতংকিত হৈ পৰিছে ৷