কৰিমগঞ্জ, ২১ ফেব্ৰুৱাৰী: ধৰ্ষণকাৰীক আৰক্ষীৰ জালৰ পৰা মুকলি কৰাৰ বিৰুদ্ধে প্ৰতিবাদত নামিল একাংশ ৰাইজ । আৰক্ষীৰ এনে কাণ্ডত ক্ষুদ্ধ হৈ ওলাই আহিল শ শ প্ৰতিবাদকাৰী । এই ঘটনা সংঘটিত হৈছে কৰিমগঞ্জ জিলাত ।
জিলাখনৰ ৰিংকু আৰু ৰাংকু নমশূদ্ৰ নামৰ দুই ধৰ্ষণকাৰীক আৰক্ষীয়ে মুকলি কৰি দিয়াৰ বিৰুদ্ধে কালীগঞ্জ আৰক্ষী অধীক্ষকৰ কাৰ্যালয়ৰ সম্মুখত উত্তাল প্ৰতিবাদ সাব্যস্ত কৰে শতাধিক ৰাইজে । অনতি পলমে ধৰ্ষণকাৰী দুজনক গ্ৰেপ্তাৰৰ দাবী স্থানীয় ৰাইজৰ ।
ঘটনা অনুসৰি, ৰিংকু আৰু ৰাংকু নমশূদ্ৰই দীৰ্ঘদিনৰে পৰা জিলাখনৰ যুৱতী, মহিলাক যৌন অতিশায্য, শ্লীলতা হানি কৰি আহিছে । স্থানীয় লোকৰ অভিযোগ, ঘৰত কোনো নথকাৰ সুযোগ গ্ৰহণ কৰি যুৱতী, মহিলা অকলে থকা অৱস্থাত এই দুই ব্যক্তিয়ে যৌন আতিশয্য, শ্লীলতা হানি কৰে । কিছুদিন পূৰ্বেও দুগৰাকী যুৱতীৰ শ্লীলতা হানিৰ চেষ্টা চলাইছিল ব্যক্তি দুজনে । ইয়াৰ লগে লগে ভুক্তভোগী দুগৰাকীৰ পৰিয়ালৰ লোকে কালীগঞ্জ আৰক্ষী থানাত ৰিংকু আৰু ৰাংকু নমশূদ্ৰৰ বিৰুদ্ধে এজাহাৰ দাখিল কৰিছিল ।