কৰিমগঞ্জ, 10 ডিচেম্বৰ : নেছৰ আহ্বানত অসমৰ চুবুৰীয়া ৰাজ্য ত্ৰিপুৰাৰ অ'টোনমাছ ডিষ্ট্ৰিক্ট কাউন্সিল চমুকৈ এডিছি এলেকাত কেব বিৰোধী আন্দোলন অব্যাহত আছে ৷ মঙলবাৰে বিয়লি ত্ৰিপুৰাৰ কাঞ্চনপুৰ, আনন্দবজাৰ, মনু, গণ্ডাচৰাকে ধৰি বহুকেইটা স্থানত আয়োজন কৰা প্ৰতিবাদত আৰক্ষী আৰু বন্ধ সমৰ্থকৰ মাজত হতাহতিৰ ঘটনা সংঘটিত হয় ৷ পৰিস্থিতি অধিক অৱনতি হোৱাত আৰক্ষীয়ে শূন্যলৈ গুলীচালনা কৰিব লগা হয় ৷
নাগৰিকত্ব সংশোধনী বিধেয়ক বাতিল আৰু ত্ৰিপুৰা লেণ্ডৰ দাবীত প্ৰতিবাদকাৰীয়ে এই আন্দোলন সাব্যস্ত কৰে । কাঞ্চনপুৰ এলেকাত বহু কেইখন ব্যৱসায়িক প্ৰতিষ্ঠান জ্বলাই দিয়াৰ লগতে এখন বাহনতো দুস্কৃতিকাৰীয়ে অগ্নিসংযোগ কৰে ৷ ইয়াৰোপৰি, গণ্ডাচৰা এলেকাত অৱৰোধৰ মাজত হাস্পতাললৈ যোৱা এখন এম্বুলেন্স বন্ধ সমৰ্থকে অৱৰোধ কৰি ৰখাৰ ফলত এটি কনমানিৰ মৃত্যু হোৱাৰ তথ্যও লাভ কৰা হৈছে ৷ আনহাতে, ৰাজ্য চৰকাৰৰ গৃহ বিভাগৰ তৰফৰ পৰা আইন-শৃংখলা ৰক্ষা কৰিবৰ বাবে দুদিনৰ কাৰণে ইণ্টাৰনেট সেৱা বন্ধ ঘোষণা কৰা হৈছে ।