অতিষ্ঠ ৰাইজঃ বিদ্যুৎ বিভাগৰ কাৰ্যালয়ত ওলোমালে তলা

চাৰিদিন ধৰি বিদ্যুৎ যোগান বন্ধ পাথাৰকান্দি পাৱাৰ হাউচৰ কাষৰীয়া থকা গাঁৱত ৷ উপায়ন্তৰ ৰাইজে কাৰ্যালয়ত ওলোমালে তলা ৷

পাথাৰকান্দি, 19 জুন : আছে গৰু নাবাই হাল তেন্তে তেনে গৰু থকাতকৈ নথকাই ভাল ৷ এই কথাষাৰিয়ে যেন আখৰে আখৰে প্ৰতিপন্ন হৈছে পাথাৰকান্দি পাৱাৰ হাউচৰ ক্ষেত্ৰত ৷ উৎকট গৰমে ৰাজ্যবাসীক দহাৰ সময়তে বিগত চাৰিদিন ধৰি বিদ্যুৎ যোগান বন্ধ হৈ পৰিছে পাথাৰকান্দি পাৱাৰ হাউচৰ কাষতে থকা গাঁৱত । আবেদন নিবেদন কৰিও কৰ্তৃপক্ষৰ পৰা কোনোধৰণৰ সঁহাৰি লাভ নকৰি ক্ষোভিত হৈ পৰা অঞ্চলটোৰ ৰাইজে তলা ওলোমালে পাথাৰকান্দি বিদ্যুৎ বিতৰণ সংস্থাৰ কাৰ্যালয়ত ৷ বহু চেষ্টা কৰিও কাৰ্যালয়ত প্ৰৱেশ কৰিব নোৱাৰে কৰ্মীকে ধৰি বিভাগীয় আধিকাৰীকসকল । পাচত আৰক্ষীৰ দল উপস্থিত হৈ পৰিস্থিতি নিয়ন্ত্ৰণ কৰাৰ লগতে চক্ৰ বিষয়াৰ পৰা দুদিনৰ সময় বিচাৰে কাৰ্যালয়ৰ ইঞ্জিনীয়াৰে । লগতে দুদিনৰ ভিতৰত ট্ৰান্সফৰ্মাৰ লগোৱা হ'ব বুলি ৰাইজক প্ৰতিশ্ৰুতি প্ৰদান কৰাতহে খাম কাটে পৰিস্থিতি৷