বদৰপুৰ, 25 ডিচেম্বৰঃ এগৰাকী সাধাৰণ মটৰ মেকানিক হৈয়ো কৰিমগঞ্জ জিলাৰ মদন ৰায়ে নিৰ্মাণ কৰি উলিয়াইছে এখন জেচিবি ৷ মাত্ৰ পাঁচহাজাৰ টকা খৰচ কৰি ৰায়ে নিৰ্মাণ কৰি উলিয়াইছে ক্ষুদ্ৰাকৃতিৰ জেচিবিখন ৷ বদৰপুৰ সমষ্টিৰ বনাখআলা গাঁৱৰ বাসিন্দা মদন ৰায়ে জেচিবিৰ উপৰিও নিৰ্মাণ কৰি উলিয়াইছে এখন স্পীদবোট ৷ আনকি নিজ হাতে নিৰ্মাণ কৰা স্পীদবোটখন স্থানীয় গোমটি নৈত চলায়ো দেখুৱায় ৰায়ে ৷
কোনোধৰণৰ আনুষ্ঠানিক শিক্ষা অবিহনেই একমাত্ৰ নিজ কৰ্মদক্ষতাৰ বলতে ৰায়ে নিৰ্মাণ কৰি উলিয়াইছে ইটোৰ পিচত সিটো যন্ত্ৰ ৷ ইয়াৰ পূৰ্বে ৰায়ে এখন হেলিকপ্টাৰ নিৰ্মাণ কৰি উলিয়াইছিল যদিও অলপ সময় উৰাৰ পিচতেই হেলিকপ্টাৰখন দুৰ্ঘটনাগ্ৰস্থ হয় ৷ মদন ৰায়ৰ এই কাৰ্যদক্ষতা কোনোধৰণৰ আনুষ্ঠানিক শিক্ষা অবিহনে সম্ভৱ হৈ পৰিছে ৷ কৰিমগঞ্জৰ এটা গেৰেজত কাম কৰি পৰিয়াল চলাই থকা মদনে অসম চৰকাৰৰ পৰা সাহাৰ্য লাভ কৰিলে আগলৈ আৰু অধিক যন্ত্ৰ বনাবলৈ সক্ষম হ'ব বুলি ইটিভি ভাৰতৰ আগত প্ৰকাশ কৰে ৷