কৰিমগঞ্জত অব্যাহত আছে লংগাই নৈৰ ভয়ংকৰ গৰাখহনীয়া

কৰিমগঞ্জত অব্যাহত আছে লংগাই নৈৰ ভয়ংকৰ গৰাখহনীয়া । লংগাইৰ বুকুত নিশ্চিহ্ন হল কেইবাখনো গাঁৱৰ যাতায়তৰ একমাত্ৰ ভৰষাৰ এটা পথ । বাৰিষা অহাৰ লগে লগে আতংকিত হৈ পৰে নৈপৰীয়া ৰাইজ ।

কৰিমগঞ্জ, 5 জুলাই:কৰিমগঞ্জত অব্যাহত আছে লংগাই নৈৰ ভয়ংকৰ গৰাখহনীয়া । বিশেষকৈ ৰাজ্যৰ ভিতৰত এনে কেইখনমান নৈ আছে, যিসমূহ নৈ বলিয়া নৈ হিচাপে পৰিচিত । লংগাই নৈৰ বুকুত নিশ্চিহ্ন হ’ল কেইবাখনো গাঁৱৰ যাতায়তৰ একমাত্ৰ ভৰষাৰ এটা অতি গুৰুত্বপূৰ্ণ পথ । জানিব পৰা মতে, কৰিমগঞ্জ জিলাৰ উত্তৰ কৰিমগঞ্জ সমষ্টিৰ অন্তৰ্গত গান্ধাইমুখ গাঁৱত লংগাই নৈৰ খহনীয়াৰ কবলত পৰি জাহ গৈছে এটা পকী পথ ।

ব্যস্ত পথছোৱাৰ খহনীয়াগ্ৰস্ত প্ৰায় তিনিশ মিটাৰ অংশ মেৰামতি নোহোৱাৰ পূৰ্বেই শনিবাৰে পুৰণা খহনীয়া অংশৰ পৰা প্ৰায় দুশ মিটাৰ নিলগত পুনৰ খহিল আৰু দুশ মিটাৰ অংশ । যাৰ ফলত ছেবৰা, পুটিমাৰা, মেদা, কাটাগ্ৰাম, লামা বাহাদুৰপুৰ, দিঘলবাগ, গান্ধাইমুখ আদি গাঁৱৰ প্ৰায় চাৰি হাজাৰ লোকৰ যাতায়তৰ একমাত্ৰ পথটোৰে যোগাযোগ বিচ্ছিন্ন হৈ পৰিছে ।

মিজোৰামৰ পৰা বৈ অহা লংগাই নৈয়ে ভৰ বাৰিষাৰ সময়ত ভয়ংকৰ ৰূপ ধাৰন কৰে । সম্প্ৰতি বাৰিষা অহাৰ লগে লগে ৰাজ্যৰ আন নৈৰ সমান্তৰালকৈ লংগাই নৈৰ জলস্তৰো লাহে লাহে বৃদ্ধি পাব ধৰিছে । বিশেষকৈ এই নৈৰ খহনীয়াৰ কৱলত পৰি যিসকল লোক ইতিমধ্যে সৰ্বহাৰা হৈ পৰিছে, সেইসকল লোক বাৰিষা অহাৰ লগে লগে যথেষ্ট চিন্তিত হৈ পৰে ।

এই পথেৰে বৰ্তমান খোজকাঢ়ি পাৰ হোৱাটো বিপজ্জনক হৈ পৰিছে । বিদ্যালয়ৰ খোলাৰ পাচতে কণ কণ ছাত্ৰ-ছাত্ৰীসকল বিপজত পৰিব বুলিও আশংকা কৰা হৈছে ৷ পুৰনা খহনীয়া মেৰামতিৰ দাবী পূৰণ নোহোৱাৰ আগতেই পুনৰবাৰ খহনীয়াৰ কৱলত পৰি যোগাযোগ বিচ্ছিন্ন হৈ বৰ্তমান উক্ত এলেকাত হাহাকাৰ অৱস্থাৰ সৃষ্টি হৈছে ।

এই খবৰ লাভ কৰি জলসম্পদ বিভাগৰ অধিকাৰীক লগত লৈ খহনীয়া পৰিদৰ্শন উত্তৰ কৰিমগঞ্জ সমষ্টিৰ বিধায়ক কমলাক্ষ দে পুৰকায়স্থৰ। বিধায়ক উপস্থিত ভোক্তভোগী ৰাইজে অতি শীঘ্ৰে খহনীয়া প্ৰতিৰোধৰ দাবী জনাইছে । এই সন্দৰ্ভত বিধায়ক কমলাক্ষ দে পুৰকায়স্থই খহনীয়া লৈ মন্ত্ৰীৰ লগতে আলোচনা কৰি অতি সোনকালে মেৰামেতি কৰা হ’ব বুলি প্ৰকাশ কৰে ৷

লগতে পঢ়ক:শিৱসাগৰত অৰুণোদয় স্মাৰকৰ আধাৰশিলা স্থাপন