কৰিমগঞ্জ, 16 আগষ্ট: ৰাজ্যত অব্যাহত আছে কৰণা ভাইৰাছৰ আতংক ৷ এই আতংকৰ বাবে ৰাজ্যৰ বহু কেইখন জিলাত বাহাল আছে লক ডাউন ৷ কিন্তু স্বাধীনতা দিৱসৰ দিনটোতে চৰকাৰৰ এই নিৰ্দেশনা ভংগ কৰিলে খোদ এগৰাকী শীৰ্ষ পৰ্যায়ৰ আৰক্ষী বিষয়াই ৷ স্বাধীনতা দিৱস উপলক্ষে দেওবাৰে কৰিমগঞ্জৰ বিনোদিনী গাঁও পঞ্চায়তৰ বালিয়া বজাৰত অনুষ্ঠিত হোৱা এখন ফুটবল প্ৰতিযোগিতাত উপস্থিত থকা দেখা গ'ল নিলামবজাৰ থানাৰ ভাৰপ্ৰাপ্ত আৰক্ষী বিষয়া মনোৰঞ্জন সিনহাক ৷
উল্লেখ্য যে, চৰকাৰী নীতি নিয়ম ভংগ কৰি স্বাধীনতা দিৱসৰ উপলক্ষে দেওবাৰে কৰিমগঞ্জৰ বিনোদিনী গাঁও পঞ্চায়তৰ বালিয়া বজাৰত অনুষ্ঠিত হৈছিল এখন ফুটবল প্ৰতিযোগিতা ৷ কিন্তু উক্ত খেল খনত বাধা দিয়াৰ পৰিৱৰ্তে খোদ নিজেই উপস্থিত থাকি খেল উপভোগ কৰে নিলামবজাৰ থানাৰ ভাৰপ্ৰাপ্ত আৰক্ষী বিষয়া মনোৰঞ্জন সিনহাই ৷ ইয়াকে লৈ সচেতন মহলৰ মাজত তীব্ৰ প্ৰতিক্ৰিয়া ৷ চৰকাৰী নীতি নিৰ্দেশনা উলংঘা কৰি এনে ৰাজহুৱা সমাগমক বাধা প্ৰদান নকৰি এগৰাকী শীৰ্ষ পৰ্যায়ৰ বিষয়া নিজেই উপস্থিত থকা ঘটনাক সহজে মানি ল’ব পৰা নাই ৰাইজে ৷
লগতে পঢ়ক : যোগাসনেৰে ৰাজ্যলৈ গৌৰৱ কঢ়িয়াইছে মালিগাঁৱৰ কুহি ডেকাই
