কৰিমগঞ্জত দাৰে ডিঙি কাটি মহিলাক হত্যা

কৰিমগঞ্জত টকাৰ বাবে নিজ বৌৱেকক দাৰে ডিঙি কাটি হত্যা কৰে দেউৰেকে ৷ মৃত মহিলাগৰাকীৰ নাম ফৰিদা বেগম বুলি জানিব পৰা গৈছে ৷

কৰিমগঞ্জ,31 জানুৱাৰী: কৰিমগঞ্জ চহৰৰ সমীপৰ মোবাৰকপুৰত সংঘটিত হয় নৃশংস হত্যাকাণ্ড ৷ নিজ বৌৱেকক দাৰে ডিঙি কাটি হত্যা কৰে দেউৰেকে । জানিব পৰা মতে, ফৰিদা বেগমৰ বিবাহ হৈছিল একে অঞ্চলৰে খাজুৰ উদ্দিন নামৰ ব্যক্তি জনৰ সৈতে ৷ বিবাহৰ পিছৰ পৰাই ফৰিদা বেগমৰ পিতৃৰ পৰা প্ৰায়ে টকা পইচা লৈ আহে স্বামীৰ পৰিয়ালৰ লোকে । বৃহস্পতিবাৰে টকা আনিব গৈছিল স্বামীৰ ভায়েক ৰাজু উদ্দিনে । কিন্তু টকা দিব পৰা নাছিল ফৰিদাৰ পৰিয়ালৰ লোকে । ফলতে খং কৰি ওলাই আহে দেউৰেক ৰাজু উদ্দিনে । কিছু সময় পিছত কোনো লোকে ফোন কৰি ফৰিদা বেগমৰ অৱস্থা বেয়া বুলি জনাই ফৰিদাৰ পিতৃক ৷ খবৰ পাই ফৰিদাৰ মাকৰ ঘৰৰ পৰিয়ালে আহি প্ৰত্যক্ষ কৰে পাকঘৰতে দাৰে ডিঙি কাটি হত্যা কৰা হৈছে ফৰিদাক । ঘটনাৰ পিছত ফৰিদাৰ মৃতদেহ পেলাই থৈ আত্মগোপন কৰে স্বামীৰ পৰিয়ালে । মৃত ফৰিদা বেগম তিনি সন্তানৰ মাতৃ । ফৰিদাৰ স্বামী খাজুৰ উদ্দিন হত্যাকাণ্ডত কিমান জড়িত এয়া এতিয়ালৈ জানিব পৰা হোৱা নাই ৷ বৰ্তমান ঘটনাক লৈ তদন্ত আৰম্ভ কৰিছে কৰিমগঞ্জ সদৰ আৰক্ষীয়ে ৷

লগতে:হাইলাকান্দিৰ ষ্টেট বেংক অফ ইণ্ডিয়াৰ এ টি এমত ডকাইতি