কৰিমগঞ্জত পকী পথ নিৰ্মাণত ব্যাপক অনিয়মৰ অভিযোগ

দক্ষিণ কৰিমগঞ্জ বিধানসভা সমষ্টিৰ অন্তৰ্গত বিনোদিনীৰ পৰা ফাকুয়ালৈ যোৱা পকী পথটো নিৰ্মাণত ব্যাপক কেলেংকাৰী সংঘটিত হোৱাৰ অভিযোগ উত্থাপন স্থানীয় ৰাইজৰ ৷ চৰকাৰী নিয়ম মানি পথটোৰ কাম সম্পূৰ্ণ নকৰিলে তীব্ৰ আন্দোলনৰ হুংকাৰ স্থানীয় ৰাইজৰ ৷

কৰিমগঞ্জ, 19 অক্টোবৰ : কৰিমগঞ্জত প্ৰধানমন্ত্ৰী গ্ৰামীণ পকী পথ যোজনাৰ কামত ব্যাপক অনিয়মৰ অভিযোগ । সোমবাৰে নিম্নমানদণ্ডৰ কাম কৰি ঠিকাদাৰে চৰকাৰী ধন আত্মসাৎ কৰাৰ অভিযোগ উত্থাপন হৈছে ৷

দক্ষিণ কৰিমগঞ্জৰ বিধায়ক আজিজ আহমেদ খানৰ ঘনিষ্ঠ ঠিকাদাৰে চৰকাৰী নীতি-নিয়ম ধোৱাচাঙত তুলি দি নিজৰ মইমতালি অব্যাহত ৰাখিছে বুলি অভিযোগ তুলিছে স্থানীয় ৰাইজে । স্থানীয় ৰাইজৰ অভিযোগ অনুসৰি,দক্ষিণ কৰিমগঞ্জ বিধানসভা সমষ্টিৰ অন্তৰ্গত বিনোদিনীৰ পৰা ফাকুয়ালৈ যোৱা প্ৰায় 3 কোটি 25 লাখ টকা ব্যয়ৰে নিৰ্মীয়মান পকী পথ নিৰ্মাণত ব্যাপক কেলেংকাৰী সংঘটিত কৰি ঠিকাদাৰে ৷ নামমাত্ৰ শিলগুটি পেলাই ইয়াৰ ওপৰত ব্লক বহুৱাই পথ নিৰ্মাণৰ কাম কৰিছে ঠিকাদাৰজনে,যাৰ ফলত পথৰ এটা বৃহৎ অংশ ইতিমধ্যে খহি গৈছে ৷

পথৰ সুৰক্ষাৰ বাবে নলা নিৰ্মাণৰ সিদ্ধান্ত গ্ৰহণ কৰা হৈছিল যদিও ঠিকাদাৰে নলা নিৰ্মাণ নকৰাৰো অভিযোগ উত্থাপন কৰিছে স্থানীয় ৰাইজে । যদি এই পদ্ধতিৰে পথ নিৰ্মাণৰ কাম ঠিকাদাৰে সম্পন্ন কৰে,তেনেহ’লে আগন্তুক বাৰিষাৰ দিনত পথৰ অস্তিত্ব নাইকিয়া হ’ব ৷ চৰকাৰী নীতি-নিয়মেৰে কাম নকৰিলে পৰৱৰ্তী সময়ত তীব্ৰ আন্দোলন গঢ়ি তোলা হ’ব বুলি হুংকাৰ দিয়ে ভুক্তভোগী ৰাইজে ৷

লগতে পঢ়ক :নাৰায়ণপুৰৰ মেধাৱী ছাত্ৰ-ছাত্ৰীৰ ব্যতিক্ৰমী প্ৰয়াস