কৰিমগঞ্জত আইন শৃংখলা পৰিস্থিতিৰ ব্যাপক অৱনতি:ব্যৰ্থ প্ৰশাসন

ইয়াৰ উপৰিও নিলাম বজাৰ থানাত গোচৰ দিবলৈ গ'লে আৰক্ষীয়ে ৫০০০ হাজাৰ টকা দাবী কৰি লয় বুলি জনোৱাৰ লগতে পাৰপত্ৰৰ নিৰীক্ষণৰ বাবে প্ৰতিজন ব্যক্তিয়ে ৫০০টকা কৈ দিব লাগে বুলিও অভিযোগ তোলে বিধায়কগৰাকীয়ে। নিশা হ'লেই থানাৰ সন্মূখত গেট বহুৱাই তালাচীৰ নামত প্ৰতিখন গাড়ীৰ পৰা ধন দাবী কৰে । অথচ আজি পৰ্যন্ত এজনো চোৰ,ডকাইত ধৰিবলৈ সক্ষম নহ'ল নিলামবজাৰ আৰক্ষী।

কৰিমগঞ্জ, 7 জানুৱাৰী:কৰিমগঞ্জ জিলাৰ নিলামবজাৰ থানা এলেকাত ক্ৰমাৎ বৃদ্ধি পাইছে অপৰাধজনিত ঘটনা ৷ জিলাখনত আইন-শৃংখলা পৰিস্থিতিৰ ব্যাপক অৱনতি ঘটাৰ লগতে অপৰাধ নিয়ন্ত্ৰণত ব্যৰ্থ হৈছে প্ৰশাসন ৷ ইয়াৰ ফলত ক্ৰমান্নয়ে জিলাখনত বৃদ্ধি পাইছে হত্যাকাণ্ড, ড্ৰাগছৰ বেহা, চুৰিকাণ্ডৰ দৰে অপৰাধসমূহ ৷ মঙলবাৰে নিলামবজাৰ চক্ৰ বিষয়াই আহ্বান কৰা আইন শৃংখলা পৰিস্থিতি নিয়ন্ত্ৰণ বিষয়ৰ এখন সভাত জিলাখনৰ আৰক্ষীৰ বিৰুদ্ধে ব্যাপক ক্ষোভ উজাৰে ৰাইজৰ লগতে স্থানীয় বিধায়ক আৰু চক্ৰ বিষয়াই ৷

বিগত ছয় মাহ ধৰি ড্ৰাগছ আৰু নিচাজাতীয় টেবলেটৰ ব্যৱসায় আৰু সেৱনৰ ঘাটিত পৰিণত হৈছে নিলামবজাৰ চক্ৰ আৰু থানা এলেকাৰ লগতে সমগ্ৰ দক্ষিণ কৰিমগঞ্জ। ড্ৰাগছৰ কৱলত পৰি অসামাজিক কাৰ্যকলাপত লিপ্ত হৈছে যুৱ প্ৰজন্ম। এই সকলো ঘটনা আৰক্ষীৰ সহযোগত ঘটি আছে বুলি অভিযোগ তুলিছে স্থানীয় ৰাইজ আৰু বিধায়কসহ চক্ৰ বিষয়াই ৷ বিভিন্ন ৰাজনৈতিক দলৰ নেতা, সামাজিক সংগঠনৰ প্ৰতিনিধি, স্থানীয় বিধায়ক, প্ৰাক্তন মন্ত্ৰী উপস্থিত থকা সভাখনত নিলামবজাৰ থানাৰ ভাৰপ্ৰাপ্ত বিষয়াগৰাকীকো আমন্ত্ৰণ জনোৱা হয় যদিও ভাৰপ্ৰাপ্ত বিষয়া এইচ.আৰ. ৰংমাই সভাত উপস্থিত নথকাৰ লগতে এজন সহকাৰী বিষয়াক পঠিয়াই দিয়া কাৰ্যক লৈ ক্ষুদ্ধ হৈ পৰে বিধায়ক আজিজ আহমেদ খান ।

নিলামবজাৰ থানাৰ ভাৰপ্ৰাপ্ত বিষয়াগৰাকীৰ সম্পূৰ্ণ সহযোগত অবৈধ ড্ৰাগছ,নিচাজাতীয় টেবলেট,মদ,জুৱা আদিৰ ৰমৰমীয়া বেহা চলি আছে। আৰক্ষী বিষয়া ৰংমাইয়ে এই সকল ব্যৱসায়ীৰ পৰা মাহিলি মোটা অংকৰ ধন লৈ ব্যৱসায় কৰাৰ সুযোগ দি আহিছে বুলি সভাখনত উপস্থিত সকলো ব্যক্তিয়ে অভিযোগ উত্থাপন কৰিছে। খোদ বিধায়ক আজিজ আহমেদ খানে ক্ষুদ্ধ হৈ উপস্থিত থকা আৰক্ষী বিষয়া গৰাকীক অসম ৰাইফলছে পিষ্টল আৰু নিচাজাতীয় টেবলেটসহ চাৰিজন লোকক আটক কৰি দিয়াৰ পাছত কিয় দুই লাখ টকা লৈ ব্যক্তি সকলক এৰি দিয়া হ'ল বুলি প্ৰশ্ন কৰে। কাৰ নিৰ্দেশত এৰি দিয়া হৈছে বুলি উত্তৰ বিচাৰে ৷ কিন্তু বিধায়কগৰাকীৰ এই প্ৰশ্নসমূহৰ উত্তৰ দিয়াত ব্যৰ্থ হয় উপস্থিত আৰক্ষী বিষয়াগৰাকী।

ইয়াৰ উপৰিও নিলাম বজাৰ থানাত গোচৰ দিবলৈ গ'লে আৰক্ষীয়ে ৫০০০ হাজাৰ টকা দাবী কৰি লয় বুলি জনোৱাৰ লগতে পাৰপত্ৰৰ নিৰীক্ষণৰ বাবে প্ৰতিজন ব্যক্তিয়ে ৫০০টকা কৈ দিব লাগে বুলিও অভিযোগ তোলে বিধায়কগৰাকীয়ে। নিশা হ'লেই থানাৰ সন্মূখত গেইট বহুৱাই তালাচীৰ নামত প্ৰতিখন গাড়ীৰ পৰা ধন দাবী কৰি লয়। অথচ আজি পৰ্যন্ত এজনো চোৰ,ডকাইত ধৰিবলৈ সক্ষম নহ'ল নিলামবজাৰ আৰক্ষী। ৩১ ডিচেম্বৰ নিশা থানাৰ পৰা ১০০ মিটাৰৰ ভিতৰত বজাৰৰ মাজত এজন ব্যক্তিক হত্যা কৰা হৈছে । সেই ঠাইলৈ যোৱাৰ বাবে অচি ৰংমাইক সময় লাগিছিল তিনি ঘণ্টা। ইপিনে মৃতদেহটো লৈ ৰাইজে পথ অৱৰোধ কৰি প্ৰতিবাদ সাব্যস্ত কৰি আছিল।

কৰিমগঞ্জ চহৰৰ পৰা সদৰ উপ আৰক্ষী অধীক্ষক উপস্থিত হৈ ৰাইজক বুজাই শান্ত কৰে। এনে এশ এবুৰি অভিযোগ উত্থাপিত কৰিছে সাধাৰণ জনগণে। অতি শীঘ্ৰে আৰক্ষী বিষয়া ৰংমাইৰ বিৰুদ্ধে বিহিত ব্যৱস্থা গ্ৰহণ কৰাৰ দাবী ৰাইজৰ। ইপিনে বিধানসভাত এই বিষয়ে উত্থাপিত কৰিব বুলি জনায় বিধায়ক আজিজ আহমেদ খানে। স্থানীয় বিজেপি নেতা নিলোৎপল দাসেও অভিযোগ কৰি কয় স্থানীয় প্ৰশাসন আইনশৃংখলা পৰিস্থিতি নিয়ন্ত্ৰণত সম্পূৰ্ণ ব্যৰ্থ হৈছে। আৰক্ষীৰ বাবে নিলাম বজাৰ এলেকাত অসামাজিক কাৰ্য-কলাপ বৃদ্ধি পাইছে। উপস্থিত চক্ৰ বিষয়াগৰাকীয়েও আৰক্ষীক তুলাধুনা দিয়ে ৷

লগতে পঢ়ক: বাৰাণসী ৰে’ল ষ্টেচনত নিষিদ্ধ একক ব্যৱহৃত প্লাষ্টিক