কৰিমগঞ্জৰ দুল্লভছড়া চাহ বাগিছাত উদ্ধাৰ অচিনাক্ত মহিলাৰ মৃতদেহ

শুকুৰবাৰে ৰাতাবাৰীৰ দুল্লভছড়া চাহ বাগিছাত চাহগছত ঔষধ ছটিওৱাই থকাৰ সময়ত দুগৰাকী শ্ৰমিকে, এগৰাকী অচিনাক্ত মহিলাৰ মৃতদেহ প্ৰত্যক্ষ কৰে ৷ বাগিছাৰ নলাত উলংগ অৱস্থাত পৰি আছিল মৃতদেহটো ৷

কৰিমগঞ্জ, 5 জুনঃৰাতাবাৰীৰ দুল্লভছড়া চাহ বাগিছাত এগৰাকী অচিনাক্ত মহিলাৰ মৃতদেহ উদ্ধাৰক লৈ সৃষ্টি হৈছে তীব্ৰ চাঞ্চল্যৰ ৷ জানিব পৰা মতে, চাহগছত ঔষধ ছটিওৱাৰ সময়ত দুগৰাকী শ্ৰমিকে বাগিছাৰ নলাত উলংগ অৱস্থাত মৃতদেহটো পৰি থকা দেখে ৷ মৃতদেহটো দেখি শ্ৰমিক দুগৰাকীয়ে ততাতয়াকৈ বাগিছা কৰ্তৃপক্ষক অৱগত কৰে ৷

কৰ্তৃপক্ষই ৰাতাবাৰী আৰক্ষী চকীত খবৰ দিয়াত ঘটনাস্থলীত আৰক্ষীৰ লোক উপস্থিত হৈ মৃতদেহটো উদ্ধাৰ কৰি কৰিমগঞ্জ অসামৰিক চিকিৎসালয়লৈ মৰণোত্তৰ পৰীক্ষাৰ বাবে প্ৰেৰণ কৰে ৷ ঘটনা সন্দৰ্ভত ইতিমধ্যে তদন্ত আৰক্ষীয়ে আৰম্ভ কৰিছে যদিও বৰ্তমানলৈ পৰিচিতি ওলোৱা নাই মহিলাগৰাকীৰ ৷

লগতে পঢ়কঃডবকাত বাল্য বিবাহৰ ঘটনাঃ উদ্ধাৰ নাবালক-নাবালিকা