কৰিমগঞ্জ, 17 ছেপ্তেম্বৰ : কৰিমগঞ্জ জিলাৰ পিছপৰা সম্প্ৰদায়ৰ সৈতে মত-বিনিময় বিধানসভাৰ অধ্যক্ষ বিশ্বজিৎ দৈমাৰীৰ(Biswajit Daimary) ৷ বুধবাৰে সন্ধিয়া ভাগত পাথাৰকান্দি সমষ্টিৰ অন্তৰ্গত অসম-মিজোৰাম সীমান্তৰ মানিকবন্দ গাঁৱত এক অনুষ্ঠানত ভাগ লয় অধ্যক্ষগৰাকীয়ে ৷
সভাত উপজাতি আৰু পিছপৰা সম্প্ৰদায়ৰ লোকসকলৰ সৈতে মত-বিনিময় কৰি অধ্যক্ষগৰাকীয়ে আদিবাসী আৰু উপজাতিসকলৰ বাস্তৱ ছবিখন মুখ্যমন্ত্ৰীৰ সন্মুখত দাঙি ধৰাৰ আশ্বাস দিয়ে ৷ ৰাজ্যত বিধানসভা অধিৱেশনত ইতিমধ্যে ‘আদিবাসীৰ নিষ্ঠা আৰু সংস্কৃতি’ নামৰ এটা নতুন বিভাগৰ অনুমোদন জনোৱা হৈছে।
এই নতুন বিভাগটোৰ দায়িত্বত আছে খোদ অধ্যক্ষ বিশ্বজিৎ দৈমাৰী ৷ আদিবাসীসকলৰ যাৱতীয় সমস্যা সমাধানৰ ক্ষেত্ৰত প্ৰতিটো উপজাতি অধ্যুষিত অঞ্চলত উপযুক্ত ব্যবস্থা গ্ৰহণৰ বাবে চৰজমিনে উপস্থিত হৈ তথ্য সংগ্ৰহ কৰিছে অধ্যক্ষগৰাকীয়ে ।
অধ্যক্ষ দৈমাৰীয়ে কয় যে, ৰাজ্যৰ বেলেগ বেলেগ অঞ্চলৰ উপজাতি তথা আদিবাসীসকলৰ যিসকেল চৰকাৰী সা-সুবিধা ভোগ কৰি আছে, তেওঁলোকৰ লেখীয়াকৈ কৰিমগঞ্জৰ উপজাতিসকলকো চৰকাৰী সুবিধা প্ৰদান কৰা হ’ব ৷ আদিবাসীসকলৰ যাৱতীয় ধর্মীয় আৰু সাংস্কৃতিক উন্নয়নতো বিশেষ ভূমিকা লোৱা হ’ব । তেওঁলোকৰ সন্তানৰ পঢ়া-শুনাৰ ক্ষেত্ৰত মানিকবন্দত এখন একলব্য বিদ্যালয় স্থাপন কৰা হ’ব বুলিও অধ্যক্ষগৰাকীয়ে সদৰী কৰে ।
উল্লেখ্য যে, ৰাজ্য চৰকাৰ তথা মুখ্যমন্ত্ৰী ড৹ হিমন্ত বিশ্ব শর্মাৰ(Himanta Biswa Sarma) নিৰ্দেশমৰ্মে বৰাক উপত্যকাৰ আদিবাসীসকলৰ খবৰ ল’বলৈ তিনিদিনিয়া কাৰ্যসূচীৰে বৰাকত উপস্থিত হয় অধ্যক্ষ বিশ্বজিৎ দৈমাৰী ৷ ছেণ্ট জোছেফ স্কুলৰ খেলপথাৰত আয়োজন কৰা সভাত তেওঁৰ সৈতে উপস্থিত থাকে লক্ষীপুৰৰ বিধায়ক কৌশিক ৰাই, ডিমা হাছাওৰ বিধায়ক নন্দিতা গাৰ্লোচা, ৰাতাবাৰীৰ বিধায়ক বিজয় মালাকাৰ আৰু পাথাৰকান্দিৰ বিধায়ক কৃষেন্দু পাল ৷
লগতে পঢ়ক:স্বাক্ষৰিত শান্তি চুক্তিকলৈ মিশ্ৰিত প্ৰতিক্ৰিয়া অব্যাহত আছে কাৰ্বি পাহাৰত
