কৰিমগঞ্জত আটক দুই আফগান নাগৰিক

কৰিমগঞ্জৰ পাথাৰকান্দিত সোমবাৰে আৰক্ষীয়ে অভিযান চলাই আটক কৰে দুই আফগানিস্থানৰ নাগৰিকক । আটকাধীন নাগৰিক দুজন বাহাদুৰ খান আৰু শ্বেৰ খান ৷ লোকদুজনৰ প্ৰকৃত ঘৰ আফগানিস্থানৰ পাৰ্টিকা জিলাত ৷

কৰিমগঞ্জ, 29 এপ্ৰিলঃ কৰিমগঞ্জ আৰক্ষীয়ে গোপন সূত্ৰৰ ভিত্তিত অভিযান চলাই পাথাৰকান্দি চহৰৰ মেইন ৰোডৰ মফিজুল হক তাপাদাৰ নামৰ এগৰাকী লোকৰ গৃহৰ পৰা আটক কৰে আফগান নাগৰিক দুজনক । আৰক্ষীয়ে লোক দুজনৰ পৰা ভাৰতৰ পান কার্ড, আধাৰ কার্ডসহ কেইবাখনো ভুৱা পাচবুক আৰু জন্ম নথিপত্ৰ জব্দ কৰে ৷

উল্লেখ্য যে, বিগত দুই বছৰ লোক দুজনে অবৈধভাৱে পাথাৰকান্দিত বসবাস কৰি আহিছিল ৷ আৰক্ষীয়ে দেওবাৰেই আফগান নাগৰিক দুজনক আটক কৰিছিল যদিও সংবাদ মাধ্যমৰ পৰা এই তথ্য গোপনে ৰখাত বৰ্তমান আৰক্ষীৰ ভূমিকাক লৈ ৰহস্যৰ সৃষ্টি হৈছে ।