কৰিমগঞ্জ জিলাৰ আটাইতকৈ পৰিস্কাৰ গাঁওখনঃ গৰাখহনীয়াৰ দুঃচিন্তাৰে নিদ্ৰাহৰণ স্থানীয় বাসিন্দাৰ

বিগত বহু বছৰৰ পৰাই গৰাখহনীয়াৰ সমস্যাৰে জৰ্জৰিত হৈ আহিছে কৰিমগঞ্জ জিলাৰ বদৰপুৰ সমষ্টিৰ অন্তৰ্গত চৈতন্য নগৰ নামৰ এখন গাঁও ৷ উল্লেখ্য যে, বিগত বৰ্ষত এই গাঁওখনে স্বীকৃতি পাইছিল কৰিমগঞ্জ জিলাৰ ভিতৰতে আটাইতকৈ পৰিস্কাৰ গাঁও হিচাপে ৷ কিন্তু আজিলৈ এই গাঁওখনে পোৱা নাই গৰাখহনীয়া ৰোধৰ বাবে কোনো বিহিত ব্যৱস্থা ৷

কৰিমগঞ্জ, 27 ফেব্ৰুৱাৰীঃকৰিমগঞ্জ জিলাৰ বদৰপুৰ সমষ্টিৰ অন্তৰ্গত চৈতন্য নগৰ নামৰ এখন গাঁৱক জিলাখনৰ ভিতৰতে আটাইতকৈ পৰিস্কাৰ গাঁও হিচাপে ঘোষণা কৰা হৈছিল ৷ প্ৰায় ডেৰ শতাধিক পৰিয়ালৰ বসতিপূৰ্ণ এই গাঁওখন সম্প্ৰতি বিপদাপন্ন অৱস্থাত ৷ কিয়নো গাঁওখনৰ ৰাইজ এতিয়া সংকিত ভয়াৱহ গৰাখহনীয়াৰ দুঃচিন্তাত ৷ মাত্ৰ কেইদিনমান পিচতেই বাৰিষাৰ বৰাক নৈত বুৰ যাব পাৰে এই গাঁওখন ৷

এই সমস্যা আজিৰ নহয় ! বিগত বহু বছৰৰ পৰাই গৰাখহনীয়াৰ সমস্যাৰে জৰ্জৰিত হৈ আহিছে গাঁওখন ৷ স্থানীয় ৰাইজে জানিবলৈ দিয়া অনুসৰি ইতিমধ্যেই গাঁওখনৰ বহুকেইটা পৰিয়ালৰ বাসগৃহ জাহ গৈছে বৰাক নৈৰ বুকুত ৷ বহু পৰিয়ালে গৃহহাৰা হোৱাৰ শংকাত নিজৰ সকলো এৰি গুছি যাবলগীয়া হৈছে অন্য স্থানলৈয়ো ৷ গৰাখহনীয়াৰ প্ৰত্যাহ্বানত এতিয়া 100 বছৰ পুৰণি এটি মন্দিৰো ৷ অভিযোগ অনুসৰি গাঁওবাসীৰ বহু আবেদন নিবেদনৰ পিচতো কাণষাৰ নাই জলসিঞ্চন বিভাগৰ লগত স্থানীয় বিধায়ক জামাল উদ্দীনৰ ৷ বছৰ বছৰ ধৰি গাঁওখন ৰক্ষাৰ স্বাৰ্থত বিভাগীয় কৰ্তৃপক্ষৰ পৰা আশ্বাসৰ সলনি একো পোৱা স্থানীয় বাসিন্দা সকলে ৷

গৰাখহনীয়াৰ দুঃচিন্তাই নিদ্ৰাহৰণ কৰা স্থানীয় বাসিন্দাসকলৰ অনুৰোধক সন্মান জনাই, অতি শীঘ্ৰে কোনো বিহিত ব্যৱস্থা লোৱাৰ বাবে এতিয়া চৰকাৰ তথা বিভাগীয় কৰ্তৃপক্ষৰ ওচৰত অনুৰোধ জনাইছে এই লোকসকলে ৷