কৰিমগঞ্জ, ৯ এপ্ৰিলঃঅহা ১১ এপ্ৰিলত অনুষ্ঠিত হ'বলগীয়া প্ৰথম পৰ্যায়ৰ ভোটগ্ৰহণৰ বাবে আজি বিয়লিৰ ভাগত অন্ত পৰিব নিৰ্বাচনী প্ৰচাৰ । প্ৰথম পৰ্যায়ত ব্ৰহ্মপুত্ৰ উপত্যকাৰ পাঁচটা লোকসভা সমষ্টিত অনুষ্ঠিত হ'ব নিৰ্বাচন । আনহাতে বৰাক উপত্যকাত দ্বিতীয় পৰ্যায়ত অনুষ্ঠিত হ'ব নিৰ্বাচন । ইতিমধ্যে দ্বিতীয় পৰ্যায়ৰ নিৰ্বাচনৰ বাবে সাজু হৈ উঠিছে বৰাকবাসী ।
বৰাক উপত্যকাৰ অন্যতম লোকসভা সমষ্টি কৰিমগঞ্জ লোকসভা সমষ্টিটো এতিয়া তুংগত উঠিছে নিৰ্বাচনী প্ৰচাৰ। সমষ্টিটোত কংগ্ৰেছৰ সমান্তৰালকৈ নিৰ্বাচনী প্ৰচাৰ অব্যাহত ৰাখিছে এ আই ইউ ডি এফ দলে । অভিযোগ-প্ৰতি অভিযোগেৰে ভোটাৰৰ মন জয় কৰাৰ চেষ্টা অব্যাহত ৰাখিছে প্ৰতিটো দলে ।
সোমবাৰে ৰাতাবাৰী সমষ্টিৰ কেইবাখনো নিৰ্বাচনী সভাত অংশগ্ৰহণ কৰিছিল হাইলাকান্দিৰ বিধায়ক আনোৱাৰ হুছেইন লস্কৰে । কৰিমগঞ্জ লোকসভা সমষ্টিৰ এ আই ইউ ডি এফ প্ৰাৰ্থী ৰাধেশ্যাম বিশ্বাসৰ হৈ প্ৰচাৰত অংশগ্ৰহণ কৰিছিল আনোৱাৰ হুছেইন লস্কৰে । নিৰ্বাচনী সভাত অংশ লৈ কংগ্ৰেছ আৰু বিজেপি দলক তীব্ৰ ভাষাৰে সমালোচনা কৰে বিধায়কগৰাকীয়ে । বৰাকত প্ৰতিজন কংগ্ৰেছীয়ে হৈছে বিজেপিৰ এজেন্ট, উপত্যকাটোত কংগ্ৰেছীসকল বিজেপিৰ টিম বি ।