বদৰপুৰত ৰে'লৱে আৰক্ষীৰ জালত ১৫ গৰাকী ৰহিংগীয়া

ৰেলৱে আৰক্ষীয়ে আটক কৰা দলটোত আছে 6 টা শিশু, 6 গৰাকী পুৰুষ আৰু 3 গৰাকী মহিলা ৷ উল্লেখযোগ্য যে, এই 15 জনীয়া ৰহিংগীয়াৰ দলটোৱে ৰে'লযোগে আগৰতলালৈ যাবলৈ ওলোৱাৰ সময়তে আৰক্ষীৰ জালত পৰে ৷

কৰিমগঞ্জ, 24 জুলাই : বৰাক উপত্যকাৰ কৰিমগঞ্জ জিলাৰ বদৰপুৰ ৰেলৱে ষ্টেচনত ১৫ গৰাকী ৰহিংগীয়াক আটক কৰিবলৈ সক্ষম হৈছে নিৰাপত্তা বাহিনীয়ে । জানিব পৰা মতে, আটক কৰা দলটোত আছে 6 টা শিশু, 6 গৰাকী পুৰুষ আৰু 3 গৰাকী মহিলা ৷ উল্লেখযোগ্য যে, এই 15 জনীয়া ৰহিংগীয়া দলটোৱে ৰে'লযোগে আগৰতলালৈ যাবলৈ ওলোৱাৰ সময়তে আৰক্ষীৰ জালত পৰে ৷

মন কৰিবলগীয়া যে, অবৈধভাৱে অসমত প্ৰৱেশ কৰা ৰহিংগীয়া অথবা বাংলাদেশী নাগৰিক বিভিন্ন সময়ত আৰক্ষী তথা নিৰাপত্তাৰক্ষীৰ হাতত গ্ৰেপ্তাৰ হোৱা ঘটনাই ভাৰত সীমান্ত কিমান সুৰক্ষিত সেই দিশটো উদঙাই দিয়ে ৷ জানিব পৰা মতে, ৰহিংগীয়া দলটো উত্তৰপ্ৰদেশৰ আলিগড়ৰ পৰা বাছেৰে কলকাতাৰ শিলিগুড়িলৈ আহে । শিলিগুড়িৰ পৰা কাঞ্চনজংঘা এক্সপ্ৰেছযোগে বুধবাৰে কৰিমগঞ্জৰ বদৰপুৰ ৰেল ষ্টেচনত উপস্থিত হয় ।

তাৰপাচতে বদৰপুৰৰ এখন হোটেলত ২ দিন ধৰি সময় অতিবাহিত কৰিছিল 15 জনীয়া ৰহিংগীয়া দলটোৱে । সেই অনুসৰি শনিবাৰ পুৱাৰ ভাগত ত্ৰিপুৰালৈ যোৱাৰ উদ্দেশ্যে শিলচৰ-আগৰতলা যাত্ৰীবাহী ট্ৰেইনখনৰ অপেক্ষাত আছিল ৰহিংগীয়াৰ দলটো । কৰ্তব্যত থকা বদৰপুৰ ৰে'ল আৰক্ষীৰ সন্দেহ হোৱাত দলটোক তালাচী কৰোতে সকলো ওলাই পৰে ৷

ৰে'লৱে আৰক্ষীয়ে দলটোৰ পৰা 6 টা মবাইলসহ নগদ 50 হাজাৰ টকা জব্দ কৰে ৷ জানিব পৰা মতে, চুবুৰীয়া ৰাজ্য ত্ৰিপুৰাৰ এগৰাকী লোকৰ নিৰ্দেশত উত্তৰ প্ৰদেশৰ পৰা আগৰতলা লৈ ৰাওনা হৈছিল এই দলটো । সম্প্ৰতি আটকাধীন আটাইকেইগৰাকীক আৰক্ষীয়ে বিদেশী ন্যায়াধীকৰণ আদালতলৈ প্ৰেৰণ কৰিছে ৷

লগতে পঢ়কঃ বেদখলকাৰীক শেষ সকিয়নী পীযুষ হাজৰিকাৰ