কোৱাৰেন্টাইনত থকা 13 জন ব্যক্তি মুকলি কৰিমগঞ্জ প্ৰশাসনৰ

যোৱা 31 মার্চৰ ৰাতিৰ পৰা 17 এপ্ৰিললৈকে তেওঁলোকক আইচ'লেশ্যনত ৰখা হৈছিল ৷

কৰিমগঞ্জ,18 এপ্ৰিল: কৰ'ণা ভাইৰাছৰ সংক্ৰমণৰ সম্ভাৱণাৰ প্ৰতি লক্ষ্য ৰাখি 17 দিন কোৱাৰেন্টাইনত ৰখাৰ পিছত 13 জন লোকক নিজ ঘৰলৈ উভতি যোৱাৰ অনুমতি দিলে কৰিমগঞ্জ জিলা প্ৰশাসনে ৷ উল্লেখ্য যে, অসমৰ প্ৰথম কৰ'ণা আক্ৰান্ত বুলি চিনাক্ত হৈছিল কৰিমগঞ্জৰ জিলাৰ বদৰপুৰ সমষ্টিৰ হাসানপুৰৰ জামাল উদ্দিন ৷ ইয়াৰ পাছতে জামাল উদ্দিনৰ 7 গৰাকী নিকট আত্মীয়সহ বদৰপুৰ এলাকাৰ মুঠ 13 জন লোকক গিৰীশগঞ্জ মডেল চিকিৎসালয়ত কোৱাৰেন্টাইনত ৰাখিছিল জিলা প্ৰশাসনে । যোৱা 31 মার্চৰ ৰাতিৰ পৰা 17 এপ্ৰিললৈকে তেওঁলোকক আইচ'লেশ্যনত ৰখা হৈছিল ৷

বিগত 17 টাকৈ দিন কোৱাৰেন্টাইনত ৰখাৰ পাছত ব্যক্তি কেইজনৰ দেহত কৰ'ণা ভাইৰাছৰ অৱস্থিতি ধৰা নপৰাত শুকুৰবাৰে নিশা ব্যক্তি কেইগৰাকীক ঘৰলৈ যাবলৈ অনুমতি প্ৰদান কৰে জিলা প্ৰশাসনে ৷

লগতে পঢ়কঃ ৯ গৰাকীকৈ কৰ'ণাত আক্ৰান্ত সুস্থ হৈছে অসমত