Child rescued in Diphu: ডিফুত সৰবৰাহকাৰীৰ কৱলৰ পৰা উদ্ধাৰ দুই শিশু

আপোনাৰ যদি কণমানি সন্তান আছে তেন্তে এতিয়াৰে পৰা সাৱধান হওঁক ৷ কোনো কাৰণতে ক্ষন্তেকৰ বাবে হ’লেও সন্তানক ঘৰত এৰি থৈ নাযাব ৷ কাৰণ এতিয়া সক্ৰিয় ৰূপত পিটপিটাই ফুৰিছে মানৱ সৰবৰাহকাৰী চক্ৰ ৷ আপোনাৰ ঘৰৰ কাষৰ মহিলাও জড়িত থাকিব পাৰে এনে মানৱ সৰবৰাহকাৰী চক্ৰত ৷ আপোনাৰ অনুপস্থিতিত সৰবৰাহকাৰীয়ে সুবিধা বুজি ফুচুলাই লৈ যাব পাৰে আপোনাৰ কণমানি সন্তানক(Child lifter in Nagaon) ৷ এনে এক ঘটনাই সংঘটিত হৈছে নগাঁৱত ৷

ডিফু, 4 নৱেম্বৰ: নগাওঁ জিলাৰ বটদ্ৰৱা থানা এলেকাৰ পৰা বৃহস্পতিবাৰে অপহৃত দুই শিশু শুকুৰবাৰে ডিফুৰ পৰা উদ্ধাৰ হোৱা ঘটনাই তীব্ৰ চাঞ্চল্যৰ সৃষ্টি কৰিছে(Two missing children rescued in Diphu) ৷ ডিফু আৰক্ষী, গাঁওৰক্ষী বাহিনী আৰু ইটিভি ভাৰতৰ ডিফুৰ সাংবাদিকৰ তৎপৰতাত আজি মানৱ সৰবৰাহকাৰী চক্ৰৰে জড়িত এগৰাকী মহিলাৰ কৱলৰ পৰা উদ্ধাৰ কৰা হয় কণমানি শিশু দুটিক ৷ মহিলা সৰবৰাহকাৰীগৰাকীকো আটক কৰে আৰক্ষীয়ে ৷ ধৃত মহিলাগৰাকী খাদিজা খাতুন বুলি জানিব পৰা হৈছে ৷

ডিফু আৰক্ষীয়ে এই অপহৰণ তথা সৰবৰাহৰ লগত জড়িত থকাৰ অভিযোগত ডিফুৰ ৰংনিহাঙ পথাৰৰ জিয়াউৰ ৰহমান নামৰ লোক এজনকো আটক কৰা বুলি জানিব পৰা হৈছে ৷ কাৰ্বি আংলং জিলা উপ আৰক্ষী অধীক্ষক নাহিদ কৰিশ্মাই সদৰী কৰা অনুসৰি, শিশু দুটিক বৃহস্পতিবাৰে নগাঁও জিলাৰ বৰদোৱা আৰক্ষী থানাৰ অন্তৰ্গত ভেৰভেৰীৰ পৰা মহিলাগৰাকীয়ে অপহৰণ কৰি আনিছিল ৷ মহিলাগৰাকীৰ ঘৰো ভেৰভেৰী গাঁৱত বুলি জানিব পৰা হৈছে ৷ ধৃত মহিলাগৰাকীয়ে তেওঁৰ প্ৰতিবেশীৰ দুই শিশু সন্তানক ফুচুলাই লৈ আহিছিল ৷

অপহৰণ কৰি অনা ৫ বছৰীয়া দুটি শিশুক পুৱা ডিফুৰ পৰা বাছেৰে ডিমাপুৰলৈ নিয়াৰ সময়তে গাঁওৰক্ষী বাহিনী আৰু ইটিভি ভাৰতৰ সাংবাদিক আৰু ডিফু আৰক্ষীয়ে যৌথ প্ৰচেষ্টাত আটক কৰে ৷ শিশু দুটিৰ পৰিয়ালৰ এজাহাৰৰ ভিত্তিত বটদ্ৰৱা থানাত ১০২/২০২২ নম্বৰত আৰু ভাৰতীয় দণ্ডবিধি আইনৰ ৩৬৫ ত ধাৰাত ৰুজু কৰা হৈছিল এটা গোচৰ ৷ উক্ত গোচৰৰ ভিত্তিত বৃহস্পতিবাৰে নিশাৰে পৰা ডিফু আৰক্ষীয়ে গাঁওৰক্ষী বাহিনী আৰু সাংবাদিকৰ সহযোগত অভিযান চলাইছিল ৷

অপহৰণকাৰী খাদিজাই শিশু দুটিক আনি বৃহস্পতিবাৰে নিশাটো ডিফুৰ জিয়াউৰ ৰহমানৰ ঘৰত ৰাখিছিল ৷ ইতিমধ্যে শিশু দুটিৰ পৰিয়ালৰ লোকৰ লগতে বটদ্ৰৱা আৰক্ষীৰ এটি দল ৰাওনা কৰিছে ডিফুলৈ ৷ আৰক্ষীৰ তদন্তত পোহৰলৈ আহিব এই মানৱ সৰবৰাহ চক্ৰটোত আৰু কোন কোন জড়িত আছে ৷

লগতে পঢ়ক:Tribal Sangha Protest : উচ্ছেদ বন্ধৰ দাবীত ট্ৰাইবেল সংঘৰ বৃহৎ প্ৰতিবাদ