কলিয়াবৰ, ৬ অক্টোবৰ :সাধাৰণতে পাট আৰু মুগা পলুৰ প্ৰধান খাদ্য হৈছে চোমগছ । পাট আৰু মুগা খেতিৰ বাবে চোমগছৰ অতি প্ৰয়োজন । কিন্তু এই মূল্যবান গছ কাটি তহিলং কৰিছে খোদ ৰেচম বিভাগে । কলিয়াবৰৰ সীমান্তৱৰ্তী কাৰ্বি আংলং জিলাৰ বাগৰি শিলডুবিত ৰেচম বিভাগৰ কাৰ্যালয়ত সংঘটিত হৈছে এই ঘটনা ।
এগৰাকী বিষয়াৰ নেতৃত্বত কাৰ্যালয়টোৰ চৌহদত থকা বহু সংখ্যক চোমগছ কাটি পেলোৱা হৈছে । এই ঘটনাৰ পাছতে তীব্ৰ প্ৰতিক্ৰিয়াৰ সৃষ্টি হৈছে । বিষয়াগৰাকীৰ মইমতালিত অতিষ্ঠ হৈ পৰিছে ৰেচম বিভাগত কৰ্মৰত অন্যান্য কৰ্মচাৰীসকল ।
অভিযোগ অনুসৰি স্বামীৰ সৈতে ৰেচম বিভাগৰ বিষয়া মালতী ইংলেংপিয়ে ৰেচম বিভাগৰ শিলডুবিস্থিত কাৰ্যালয়ৰ চৌহদত থকা চোম গছসমূহ কাটি পেলোৱাত ৰেচম পামখনলৈ ভাবুকি নামি আহিছে ।
অসমৰ পৰিচয় পাট-মুগাক বিশ্ব দৰবাৰলৈ লৈ যোৱাৰ বাবে চৰকাৰে বিভিন্ন পদক্ষেপ গ্ৰহণ কৰি আহিছে । কিন্তু ইয়াৰ বিপৰীতে আকৌ চৰকাৰী বিষয়াৰ এনে কাৰ্যই স্থানীয় ৰাইজ আৰু বিভাগীয় কৰ্মচাৰীসকলৰ মাজত তীব্ৰ অসন্তুষ্টিৰ সৃষ্টি কৰিছে । যাৰ বাবে চৰকাৰ তথা বিভাগীয় কতৃপক্ষক ইয়াৰ এটা উচিত তদন্ত কৰি অসমৰ ৰেচম শিল্পক জীয়াই ৰখাৰ স্বাৰ্থত যাৱতীয় ব্যৱস্থা গ্ৰহণ কৰিবলৈ দাবী জনাইছে স্থানীয় লোকসকলে ।
লগতে পঢ়ক :কৰিমগঞ্জত ওলমা দলং ছিগি কেইবাগৰাকীও ছাত্ৰ-ছাত্ৰী আহত