Assam Book Fair: ডিফুত অনুষ্ঠিত গ্ৰন্থ মেলালৈ পঢ়ুৱৈৰ ব্যাপক সঁহাৰি

ডিফুত অনুষ্ঠিত অসম গ্ৰন্থমেলাৰ তৃতীয় দিনা গ্ৰন্থপ্ৰেমীৰ আশাব্যঞ্জক সঁহাৰি (Assam Book Fair in Diphu) ৷ বুধবাৰে গ্ৰন্থমেলাৰ বাকৰিত অনুষ্ঠিত হয় ‘‘লোক পৰম্পৰাৰ চৰ্চা আৰু গ্ৰন্থ প্ৰণয়ন’’ শীৰ্ষক আলোচনা চক্ৰ ৷ অনুষ্ঠানত সাংবাদিক তথা ঔপন্যাসিক দিলীপ চন্দনৰ লগতে কেইবাগৰাকীও অতিথিয়ে লোক-সংস্কৃতি আৰু পৰম্পৰা সম্পৰ্কে মত প্ৰকাশ কৰে (Book Fair in Diphu) ৷

ডিফু, ৮ ফেব্ৰুৱাৰী: অসম প্ৰকাশন পৰিষদ, সদৌ অসম পুথি প্ৰকাশক আৰু বিক্ৰেতা সংস্থাৰ উদ্যোগত তথা কাৰ্বি আংলং জিলা প্ৰশাসনৰ সহযোগত ডিফু চৰকাৰী উচ্চতৰ মাধ্যমিক বালক বিদ্যালয়ৰ খেলপথাৰত আয়োজন কৰা হৈছে অসম গ্ৰন্থমেলা 2023 (Assam Book Fair in Diphu) ৷ এই গ্ৰন্থমেলাত বুধবাৰে বিয়লি 1 বজাত সাহিত্যিক বসন্ত দাসৰ সোঁৱৰণত অনুষ্ঠিত কৰা হয় “লোক পৰম্পৰাৰ চৰ্চা আৰু গ্ৰন্থ প্ৰণয়ন” শীৰ্ষক এখনি আলোচনা সত্ৰ ৷ আলোচনা সত্ৰখন সঞ্চালনা কৰে বিশিষ্ট সাংবাদিক তথা ঔপন্যাসিক দিলীপ চন্দনে (Discussion on Folk traditions) ৷

তেওঁ বিষয় প্ৰসংগত কয়, “লোক পৰম্পৰা-সংস্কৃতিয়ে সমাজখনক সমৃদ্ধ কৰি ৰাখে ৷ লোক-জীৱনৰ পৰম্পৰাই সভ্যতাৰ আধাৰ ৷ লোক পৰম্পৰাৰে অসমখন ঐশ্বৰ্যশালী ৷ গতিকে এই বিষয়ে সত্যাশ্ৰয়ী গৱেষণাৰ জৰিয়তে গ্ৰন্থ প্ৰণয়ন হ’লে সকলো উপকৃত হ’ব ৷” ইয়াত আলোচক অতিথিৰূপে অংশগ্ৰহণ কৰে লেখিকা তথা ডিফু মহাবিদ্যালয়ৰ অসমীয়া বিভাগৰ অধ্যাপিকা ড৹ মনালিছা ৰংপিপীয়ে ৷ তেওঁ কয় যে, অসমৰ বিভিন্ন জাতি-জনগোষ্ঠীৰ লোক পৰম্পৰাক লৈ বিভিন্ন গ্ৰন্থ প্ৰণয়ন হৈছে ৷ লোক পৰম্পৰাই সাহিত্যত ঠাই পোৱাৰ উপৰি এই বিষয়ক ইতিহাসৰ তথ্য সমৃদ্ধ গ্ৰন্থও প্ৰকাশিত হৈছে ৷ কিন্ত এয়া এতিয়াও আংশিক পৰ্যায়তে আছে ৷ এই বিষয়ে পৰিপূৰ্ণ গ্ৰন্থৰ প্ৰয়োজন আছে (Folk culture of Assam) ৷

আন এগৰাকী আলোচক অতিথি ডিফু মহাবিদ্যালয়ৰ অসমীয়া বিভাগৰ অধ্যাপিকা গীতা হাঞ্চেপীয়ে উল্লেখ কৰে যে, অসমৰ জাতি-জনগোষ্ঠীৰ লোক পৰম্পৰাক লৈ গভীৰ গৱেষণা অতি জৰুৰী ৷ এনে গৱেষণাৰ জৰিয়তে গ্ৰন্থ প্ৰণয়ন হোৱাটো জৰুৰী ৷ একেদৰে আলোচক অতিথি হিচাপে উপস্থিত থকা লেখক তথা চামগুৰি মহাবিদ্যালয়ৰ অধ্যক্ষ ড৹ ইন্দ্ৰজিৎ বেজবৰুৱাৰ মতে, এনে এটা বিষয়ক লৈ আলোচনা সত্ৰ অনুষ্ঠিত কৰি অসম প্ৰকাশন পৰিষদে আশাৰ বতৰা কঢ়িয়াইছে (Folk traditions of Assam) ৷

লগতে পঢ়ক:Assam Book Fair 2023: ডিফুত সোমবাৰৰ পৰা অনুষ্ঠিত হৈছে অসম গ্ৰন্থমেলা 2023

তেওঁ লগতে কয় যে, লোক পৰম্পৰা এটা বিশাল বিষয় ৷ জ্ঞান চৰ্চাৰ প্ৰক্ৰিয়াও লোক পৰম্পৰা ৷ লোক পৰম্পৰাই অলিখিত ৰূপত সমাজখনক ৰীতি নীতিৰে বান্ধি ৰাখে ৷ ইয়াত জ্ঞানৰ আকৰ আছে ৷ এই বিষয়ে পূৰ্ণাংগৰূপত গৱেষণা হ’লে আমাৰ লোক সমাজখনো সম্পূৰ্ণৰূপে উঠি আহিব ৷ এয়া গ্ৰন্থৰ জৰিয়তেই সম্ভৱ ৷ লোক পৰম্পৰাৰ সন্ধান মানেই হ’ল শিপাৰ সন্ধান (Book Fair in Diphu) ৷

অনুষ্ঠানটোত আলোচক অতিথিৰূপে উপস্থিত থাকি বিশিষ্ট লেখক ভৱেন কোঁচে কয় যে, যি উপাদানে এটা জাতিক একত্ৰিত কৰি ৰাখে সেয়াই লোকসংস্কৃতি ৷ লোক পৰম্পৰা হৈছে একধৰণৰ জনজাতীয় সামাজিক সংবিধান ৷ লোক পৰম্পৰাৰ পৰাই এই সমাজৰ নীতি-নিয়ম উদ্ভাৱন হয় ৷ এই বিষয়ে নিশ্চয় গ্ৰন্থ প্ৰণয়ন কৰিব পাৰি ৷ এই গ্ৰন্থ সাহিত্যৰো হ’ব পাৰে অন্য সামাজিক বিষয়ৰো হ’ব পাৰে ৷

সদৌ অসম পুথি প্ৰকাশক আৰু বিক্ৰেতা সংস্থাৰ উপদেষ্টা ক্ষীৰোদ কুমাৰ গোস্বামীও উপস্থিত থাকে উক্ত আলোচনা সভাত ৷ তেওঁ কয় যে, পুথি প্ৰকাশো এতিয়া এক পৰম্পৰাত পৰিণত হৈছে ৷ আচলতে এনেদৰেই গঢ়ি উঠা পৰম্পৰাই সমাজখনক সমৃদ্ধ কৰে ৷ তেওঁ প্ৰসংগক্ৰমে বসন্ত দাসৰ বহুল জনপ্ৰিয় “জংছন” উপন্যাসে এই বৰ্ষত অৰ্ধশতিকা অতিক্ৰম কৰা বুলি উল্লেখ কৰি প্ৰয়াত সাহিত্যিক গৰাকীলৈ শ্ৰদ্ধা নিবেদন কৰে ৷ অনুষ্ঠানটিত বিশিষ্ট লেখক চিকাৰী টিছ’, কবি ছাৰএৎ হাঞ্চে, লেখক-সাংবাদিক সঞ্জু বৰা, লেখক ভৱ প্ৰসাদ দেউৰী আদিকে ধৰি কেবাগৰাকী বিশিষ্ট ব্যক্তিয়ে অংশগ্ৰহণ কৰে ৷ সন্ধিয়া মনপৰশা সাংস্কৃতিক কাৰ্যসূচীৰ আঁত ধৰে প্ৰবোধ দাসে ৷

লগতে পঢ়ক:Assam Book Fair Diphu : গ্ৰন্থৰ সুৱাসেৰে আমোলমোল ডিফুৰ আকাশ-বতাহ