ডিফু, 31 অক্টোবৰ :প্ৰতি বছৰৰ দৰে এইবছৰো সমগ্ৰ দেশৰ লগতে অসমতো লৌহ মানৱ চৰ্দাৰ বল্লভ ভাই পেটেলৰ 145 সংখ্যক জন্ম বাৰ্ষিকীত নেতাগৰাকীক সুঁৱৰি একতাৰ দৌৰ কাৰ্যসূচী গ্ৰহণ কৰে ৷ বিজেপিৰ কাৰ্বি আংলং জিলা সমিতিৰ উদ্যোগত আয়োজন কৰা হয় এই কাৰ্যসূচীৰ ৷ শনিবাৰে দোকমোকালিতেই কাৰ্বি আংলং জিলা বিজেপিৰ সভাপতি ধনছিং টেৰণ আৰু সাধাৰণ সম্পাদক অজিত দে'ৰ নেতৃত্বত বিজেপিৰ কৰ্মকৰ্তাসকলে একতাৰ দৌৰত অংশগ্ৰহণ কৰে ৷
একতাৰ দৌৰত অংশগ্ৰহণকাৰী সকলে ডিফুস্থিত বিজেপিৰ কাৰ্যালয় চৌহদৰ পৰা ডিফু চহৰ পৰিভ্ৰমণ কৰি জয়ছিং দলৈ সোঁৱৰণি প্ৰেক্ষাগৃহ পথ হৈ পুনৰ বিজেপি কাৰ্যালয়লৈ ঘূৰি আহে ৷ পিছত সাংবাদিকৰ আগত বিজেপিৰ জিলা সভাপতি ধনছিং টেৰণ আৰু সাধাৰণ সম্পাদক অজিত দে'ই স্বাধীনতা সংগ্ৰামী নেতা লৌহ মানৱ চৰ্দাৰ বল্লভ ভাই পেটেলৰ জীৱনৰ ওপৰত এক আলোকপাত কৰে ৷ চৰ্দাৰ বল্লভ ভাই পেটলে স্বাধীনতা সংগ্ৰামত লোৱা বলিষ্ঠ ভূমিকা আৰু সৱল নেতৃত্ব নৱ প্ৰজন্মৰ আদৰ্শস্বৰূপ বুলি নেতাদ্বয়ে মন্তব্য কৰে ৷