ডকমকাত আটক দুৰ্ধৰ্ষ উগ্ৰপন্থী কেডাৰ

ডকমকাত সেনা-আৰক্ষীয়ে যৌথ অভিযানত চলাই আটক কৰিবলৈ সক্ষম হৈছে অস্ত্ৰসহ এজন পিডিচিকে কেডাৰ ৷ অভিযানকাৰী দলটোৱে কেডাৰজনৰ পৰা পিষ্টলৰ লগতে ১০ জাঁই সজীৱ গুলী আৰু দুটাকৈ ৰেডিঅ’ ছেট উদ্ধাৰ কৰে ৷

ডিফু,11 জুন:কাৰ্বি আংলঙত অব্যাহত আছে উগ্ৰপন্থীৰ বিৰুদ্ধে ব্যাপক অভিযান ৷ প্ৰায় প্ৰতিদিনে চলা এই অভিযানত সেনা-আৰক্ষীয়ে আটক কৰিবলৈ সক্ষম হৈছে উগ্ৰপন্থী সংগঠন পিডিচিকেৰ এজন দুৰ্ধৰ্ষ কেডাৰ ৷ বিগত কিছুদিন পূৰ্বে বৃহৎ অস্ত্ৰভাণ্ডাৰ উৎখাতৰ লগতে আৰক্ষীৰ অভিযানত আটক হৈছিল পিডিচিকেৰ গৃহ সচিব ডেভিড মুক্ৰাঙ সহ চাৰি কেডাৰ ৷ পুনৰ ভাৰতীয় সেনা-আৰক্ষীয়ে চলোৱা এক অভিযানত এজন কেডাৰ আটক হোৱাৰ লগতে জব্দ কৰিবলৈ সক্ষম হয় কিছু পৰিমাণৰ অস্ত্ৰ-শস্ত্ৰ ৷ ডকমকা আৰক্ষী থানাৰ অন্তৰ্গত থেৰাবাছাৰ গভীৰ অৰণ্যত এই অভিযান চলাইছিল সেনা-আৰক্ষীয়ে ৷

ধৃত কেডাৰ কুলডুঙ নিবাসী ধৰম হাঞ্চেৰ স্বীকাৰোক্তিৰ ভিত্তিত অভিযানকাৰী দলটোৱে অন্য এক অঞ্চলৰ পৰা এটা পিষ্টলৰ লগতে ১০ জাঁই সজীৱ গুলী আৰু দুটা ৰেডিঅ’ ছেট উদ্ধাৰ কৰে ৷ উল্লেখ্য যে,বিগত দুসপ্তাহ ধৰি সেনা-আৰক্ষীৰ লগতে অন্য নিৰাপত্তা বাহিনীৰ উগ্ৰপন্থী বিৰোধী অভিযানে বিশেষ তাৎপৰ্য বহন কৰিছে ৷

লগতে পঢ়ক:বাঘজান ঘটনা সন্দৰ্ভত বন মন্ত্ৰী পৰিমল শুক্লবৈদ্যৰ প্ৰতিক্ৰিয়া