ডিফু, 11 আগষ্ট: ৰাজ্য়ত প্ৰতি দিনাই বৃদ্ধি পাইছে কোভিড-19 ত আক্ৰান্ত হৈ মৃত্যু হোৱা ৰোগীৰ সংখ্যা ৷ আন সমূহ জিলাৰ দৰে কাৰ্বি আলং জিলাতো বৃদ্ধি পাইছে কোভিডত আক্ৰান্ত হৈ মৃত্যু হোৱা ৰোগীৰ সংখ্যা ৷ সোমবাৰে সন্ধিয়া ডিফু কোভিড হাস্পতালত আন এজন ৰোগীৰ মত্যু হোৱাৰ লগে লগে জিলা খনত কোভিডত আক্ৰান্ত হৈ মৃত্যু হোৱা লোকৰ সংখ্যা 6 গৰাকীলৈ বৃদ্ধি পালে ৷
উল্লেখ্য যে, সোমবাৰে সন্ধিয়া ডিফু কোভিড হাস্পতালত মৃত্যু হয় ডিফু ধৰমনালা ৰাম ঠাকুৰ কলনিৰ নিবাসী অবিনাশ দেৱনাথ নামৰ ৫০ বছৰীয়া লোকজনৰ ৷ জানিব পৰা মতে দীৰ্ঘ দিনৰ পৰা যকৃতৰ জটিল ৰোগত আক্ৰান্ত হৈ আছিল অবিনাশ দেৱনাথ ৷ সোমবাৰে সন্ধিয়া অবিনাশ দেৱনাথৰ স্বাস্থ্যৰ অৱনতি হোৱাত তেওঁক চিকিৎসাৰ বাবে ডিফু চিকিৎসা মহাবিদ্যালয় হাস্পতালত ভৰ্তি কৰোৱা হয় ৷ কিন্তু তাত অবিনাশ দেৱনাথৰ কোভিডৰ এণ্টিজেন টেষ্টৰ ফলাফল পজিটিভ ওলায় ৷ লগে লগে তেওঁক ডিফু চিকিৎসা মহাবিদ্যালয়ৰ পৰা পুৰণা ব্লকৰ কোভিড হাস্পতালৰ চিকিৎসালয়ললৈ প্ৰেৰণ কৰে যদিও সন্ধিয়া মৃত্যু হয় লোকজনৰ ৷ ইয়াৰ লগে-লগে জিলা খনত কোভিড আক্ৰান্ত হৈ মৃত্যু হোৱা লোকৰ সংখ্যা 6 গৰাকীলৈ বৃদ্ধি হয় ৷ মঙলবাৰে পুৱা প্ৰয়াত অবিনাশ দেৱনাথৰ নশ্বৰ দেহ ডিফু ৰাজহুৱা শ্মশানত পৰিয়ালৰ লোকৰ উপস্থিতিত সৎকাৰ কৰে প্ৰশাসনৰ লোকে ৷