কাৰ্বি আংলং, 30 অক্টোবৰ : অসম্ভৱকো সম্ভৱ কৰি তুলিব পৰা গুণৰ যথাৰ্থ প্ৰতিপন্ন কৰি তুলিছে কাৰ্বি আংলঙৰ বকলীয়াঘাটৰ এগৰাকী উদীয়মান দিব্যাংগ যুৱকে ৷ প্রচণ্ড আত্মবিশ্বাস আৰু প্রবল ইচ্ছাশক্তিৰে অসম্ভৱকো সম্ভৱ কৰি কার্বি আংলং জিলাৰ বকলীয়াঘাটত স্বাৱলম্বনৰ অনন্য নিদৰ্শন দাঙি ধৰিবলৈ সক্ষম হৈছে দেউৰাম বৰদলৈ নামৰ এগৰাকী দিব্যাংগ যুবকে ।
উল্লেখযােগ্য যে, বকলীয়াঘাট বাহনি আদর্শ নিবাসীৰ যুবকজনে মাত্র চাৰি বছৰ বয়সতে খেলি থকা অৱস্থাত দুর্ভাগ্যক্রমে বিদ্যুস্পৃষ্ট হয় । উক্ত ঘটনাত কোনােমতে প্রাণ ৰক্ষা পৰা যুৱকজনে চিকিৎসকৰ বিশেষ পৰিচর্যাত কোনােমতে জীৱন ঘুৰাই পাবলৈ সক্ষম হয় যদিওঁ শােকাৱহ ঘটনাত দেউৰামে বাঁওহাতখন হেৰুৱাবলগীয়া হােৱাৰ লগতে সোঁহাতৰো চাৰিটাকৈ আঙুলি হেৰুৱাবলগীয়া হয় । ইয়াৰ পিচতাে জীৱনৰ আশা হেৰুৱাব নােখােজা দেউৰামে বিগত সময়ছােৱাত কেৱল মাত্র সোঁহাতৰ বুঢ়া আঙুলিটোৱেই অসাধ্য সাধন কৰি সকলােকে বিস্ময়-বিমােহিত কৰি তােলাৰ লগতে আন দহজন সম্পূর্ণ সুস্থ যুবকৰ দৰে উলিয়াইছে আত্মসংস্থাপনৰ পথ ।
লগতে পঢ়ক :সাৱধান ! অসমত আৰম্ভ হৈছে সাংস্কৃতিক জেহাদ
হাতৰ এটা আঙুলি আৰু ভৰিৰ সহায়ত লিখা-পঢ়া কৰি হাইস্কুল শিক্ষান্ত পৰীক্ষাতাে অৱতীর্ণ হােৱা দেউৰামে এনে অৱস্থাৰে চাইকেল চলােৱাকে ধৰি অন্য সকলাে কাম-কাজ নিজাববীয়াকৈ কৰিব পাৰে । নিচেই কম বয়সতে জীৱনৰ এনে কঠিন প্রত্যাহ্বানৰ সম্মুখীন হােৱাৰ পিচতাে হাৰ নমনা যুবকজনৰ জীৱনলৈ শেহতীয়াকৈ নামি আহিছে এটাৰ পিচত আনটো দুর্যোগ । কর্মসূত্রে পিতৃ-মাতৃ অন্য ঠাইত থকাৰ হেতু বকলীয়াঘাটৰ মােমায়েকৰ আশ্রয়ত থকা যুৱকজনে কিছুদিনৰ পূর্বে মােমায়েকক হেৰুৱাবলগীয়া হয় । আনহাতে, কৰ'ণা মহামাৰীৰ সংহাৰৰ মাজতে বকলীয়াঘাটৰ বাঁহনি আদর্শত এখন চকীক কেন্দ্র কৰি সৃষ্টি হােৱা কাজিয়াৰ পৰিণতিত দেউৰামৰ মােমায়েকৰ পুত্ৰকো এগৰাকী উদণ্ড যুবকে দাৰে ঘপিয়াই নৃশংসভাৱে হত্যা কৰে । পৰিয়ালটোৰ দুজনকৈ উপার্জনক্ষম লােকৰ কম সময়ৰ ভিতৰতে মৃত্যু হােৱাৰ পিচত জীবন-জীৱিকালৈ সংকট নামি অহা পৰিয়ালটোৰ জীৱিকা উপার্জনৰ দায়িত্ব লবলগীয়া হয় দিব্যাংগ দেউৰাম ববদলৈয়ে । এনে এক পৰিস্থিতিত শেহতীয়াকৈ বকলীয়াঘাটৰ বাঁহনি আদর্শ বজাৰত এখন শাক-পাঁচলিৰ দোকান আৰম্ভ কৰি ব্যৱসায়ত হাত দিছে দেউৰাম নামৰ যুবকজনে । কেৱল মাত্র তর্জনী আঙুলি থকা এখন হাতেৰেই শাক-পাঁচলিৰ দোকান দি সুকলমে ব্যৱসায়ৰ কাম-কাজ আগবঢ়াই নিবলৈ সক্ষম হৈছে যুৱকজনে ৷