ডিফু, 25 ডিচেম্বৰঃ ৰাষ্ট্ৰসংঘৰ ইউনিচেফ আৰু উত্তৰ পূৱ ভাৰত লোকসংস্কৃতি গৱেষণা কেন্দ্ৰ "আৰ্হি"ৰ উদ্যোগত বুধবাৰে পশ্চিম কাৰ্বি আংলঙৰ বৈঠালাংছ'ত পোন প্ৰথমবাৰৰ বাবে অনুষ্ঠিত হয় উত্তৰ-পূৱ ভাৰতৰ লুপ্তপ্ৰায় খিলঞ্জীয়া ভাষাৰ বোলছবি মহোৎসৱ । এই মহোৎসৱত বৈঠালাংছ' কেন্দ্ৰীয় শংকৰ মন্দিৰৰ নামঘৰীয়া বুবুল শইকীয়াই বন্তি প্ৰজ্বলন আৰু বিশিষ্ট ব্যক্তি হেমৰাম দাসে ধুপ জ্বলাই আৰম্ভণি কৰা অনুষ্ঠানটিৰ উদ্বোধন কৰে 1 নং দোৱাৰ আমলা পৰিষদীয় সমষ্টিৰ সদস্য প্ৰভাত তাৰই ৷ এই মহোৎসৱত 4 খন বোলছবি প্ৰদৰ্শন কৰাৰ লগতে দুখন শিশু নাটিকা আৰু এখনি নৃত্য নাটিকা মঞ্চস্থ কৰা হয় ।
বৈঠালাংছ'ত পোন প্ৰথমবাৰৰ বাবে লুপ্তপ্ৰায় খিলঞ্জীয়া ভাষাৰ বোলছবি মহোৎসৱ আনহাতে কাৰ্বি ছবি "ৱ'ছ'বিপ' " মৰাণ ভাষাৰ ছবি "হান্দুক" ত্ৰিপুৰাৰ কৰক বৰক ভাষাৰ ছবি "Kwtham Kothoma" আৰু চিকিমৰ লেপছা ভাষাৰ বোলছবি "Dhokbu" প্ৰদৰ্শন কৰা হয় । স্মৰ্তব্য যে ৰাষ্ট্ৰসংঘৰ এক প্ৰতিবেদন মতে বিশ্বত প্ৰতিমাহে দুটাকৈ খিলঞ্জীয়া ভাষাৰ ইতিমধ্যে মৃত্যু হৈ আছে । ভাষা-সংস্কৃতি ৰক্ষাৰ বাবে ইউনিচেফে এই পদক্ষেপ গ্ৰহণ কৰিছে । অনাগত 10 বছৰৰ বাবে ৰাষ্ট্ৰসংঘই বিশ্বৰ খিলঞ্জীয়া ভাষা উদ্ধাৰৰ বাবে বিশেষ পদক্ষেপ গ্ৰহণ কৰিছে । আনহাতে নিজৰ ভাষা সংস্কৃতি ৰক্ষাৰ বাবে আৰু নাগৰিকত্ব সংশোধনী আইনৰ বিৰোধিতাৰে বৈঠালাংছ'ত কণ কণ শিশুসকলে বলিষ্ঠ কণ্ঠেৰে তীব্ৰ প্ৰতিবাদ সাব্যস্ত কৰে ।
আৰু পঢ়কঃঅসমীয়া যুৱ মঞ্চৰ কেন্দ্ৰীয় প্ৰতিষ্ঠা দিৱস উদযাপন
