কৰ’ণাত আক্ৰান্ত হৈ মৃত্যু ডিফু বালক উচ্চতৰ মাধ্যমিক বিদ্যালয়ৰ অধ্যক্ষ

কৰ’ণাত আক্ৰান্ত হৈ মৃত্যু ডিফু বালক উচ্চতৰ মাধ্যমিক বিদ্যালয়ৰ অধ্যক্ষ বেঞ্জামিন তেৰাঙৰ ৷ বৃহস্পতিবাৰে নিশা গুৱাহাটীৰ হায়াত হাস্পতালত মৃত্যুক সাৱতি লয় অধ্যক্ষগৰাকীয়ে ৷

ডিফু, 14 আগষ্টঃকৰ’ণাত আক্ৰান্ত হৈ মৃত্যুক সাৱতিলে ডিফু বালক উচ্চতৰ মাধ্যমিক বিদ্যালয়ৰ অধ্যক্ষ বেঞ্জামিন তেৰাঙ ৷ ইতিমধ্যেই পাহাৰীয়া জিলাখনৰ কেইবাগৰাকীও বিশিষ্ট ব্যক্তি আক্ৰান্ত হৈছে কৰ’ণা ভাইৰাছত ৷ কিন্তু ইয়াৰ মাজতে বেঞ্জামিন তেৰাঙৰ মৃত্যুৰ বাতৰিয়ে সমগ্ৰ জিলাখনতে শোকৰ ছাঁ পেলাইছে ৷ ২০১১ চনতে ডিফু বালক উচ্চতৰ মাধ্যমিক বিদ্যালয়ৰ অধ্যক্ষৰ দায়িত্বভাৰ গ্ৰহণ কৰিছিল বেঞ্জামিন তেৰাঙে ৷

উল্লেখ্য যে, বিগত 1 আগষ্টত তেখেতৰ দেহত কোভিড-19ৰ উপস্থিতি ধৰা পৰাত তেখেতক ডিফু মেডিকেল কলেজ হাস্পতালত ভৰ্তি কৰোৱা হৈছিল ৷ পৰৱৰ্তী সময়ত উন্নত চিকিৎসাৰ বাবে তেৰাঙক গুৱাহাটীৰ হায়াত হাস্পতালত ভৰ্তি কৰা হয় যদিও বৃহস্পতিবাৰে নিশা চিকিৎসালয়তে মৃত্যু হয় তেৰাঙৰ ৷ আনহাতে, তেখেতৰ পত্নী আৰু পুত্ৰও বৰ্তমান ডিফু মেডিকেল কলেজ হাস্পতালত চিকিৎসাধীন হৈ আছে ৷

অধ্যক্ষগৰাকীৰ মৃত্যুত শোক প্ৰকাশ কৰিছে কাৰ্বি আংলং স্বায়ত্ব শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ লগতে কাৰ্বি ছাত্ৰ সন্থাৰ সভাপতি আৰু সম্পাদক বিজয় বে' আৰু থানছিঙ তিমুঙে ৷
লগতে পঢ়ক-চিৰাঙৰ বান পৰিস্থিতি পৰিদৰ্শন মন্ত্ৰী চন্দন ব্ৰহ্মৰ