কৰিমগঞ্জ, 15 জুলাই: এটা জৰাজীৰ্ণ পথৰ বাবে দীৰ্ঘদিনে দুৰ্ভোগ ভুগি আহিবলগীয়া হৈছে দক্ষিণ কৰিমগঞ্জ বিধানসভা সমষ্টিৰ একাংশ লোকে । দক্ষিণ কৰিমগঞ্জ বিধানসভা সমষ্টিৰ বাটিয়া-ছৈদখানী সংযোগী বিপৰ্যস্ত পথৰ বাবে বহু সময়ত স্থানীয় লোকে সন্মুখীন হৈ আহিছে ভিন্ন অসুবিধাৰ । এই পথৰ বাবে অঞ্চলটোৰ প্ৰায় 15 শহস্ৰাধিক লোকৰ ভিন্ন উন্নয়নমূলক কামত, বাধাৰ সৃষ্টি হৈ আহিছে বুলি উল্লেখ কৰে স্থানীয় লোকে ।
উল্লেখ্য যে, স্থানীয় লোকে এই পথৰ বিষয়ে ভিন্ন সময়ত স্থানীয় জন প্ৰতিনিধিৰ লগতে বিভাগীয় কৰ্তৃপক্ষক জনাই আহিছে যদিও, আজি পৰ্যন্ত কোনো ধৰণৰ সহাৰি নাপালে তেওঁলোকে । প্ৰায় 8 হাজাৰ ভোটাৰ থকা সমষ্টিটোৰ লোকৰ দুৰৱস্থাৰ খবৰ ল'বলৈয়ো এই পৰ্যন্ত অহা নাই কোনো জন প্ৰতিনিধি । ছৈদখানী পঞ্চায়ত আৰু ইলাশপুৰ পঞ্চায়তৰ প্ৰায় 15 শহস্ৰাধিক লোকৰ ভৰসা এই পথৰ কাম বিগত নিৰ্বাচনৰ পূৰ্বে কিছু পৰিমাণে হৈছিল যদিও, নিৰ্মাণকাৰ্য আধাতে সমাপ্ত হৈ থাকিল । মাত্ৰ এজাক বৰষুণতে বাৰিষাৰ পথাৰ সদৃশ এক অৱস্থালৈ পৰিণত হয় পথটো । যাৰ বাবে বহু সময়ত শিক্ষাৰ পৰাও বঞ্চিত হৈ থাকিবলগীয়া হৈছে বৃহত্তৰ অঞ্চলটোৰ একাংশ শিশু । স্থানীয় ৰাইজে উত্থাপন কৰা অভিযোগ অনুসৰি, স্থানীয় বিধায়ক আজিজ আহমেদ খানক পথটোৰ সমস্যা সমাধান সন্দৰ্ভত যোগাযোগ কৰিলেও, কেৱল আশ্বাসৰ বাহিৰে কোনো সহাৰি পোৱা নাই তেওঁলোকে ।
লগতে পঢ়ক:এটা বিধ্বস্ত পথে অতিষ্ঠ কৰিছে কাৰ্বি আংলঙৰ লাংমেপী-আমঙবাসীক
