বিশেষ সংক্ষিপ্ত সংশোধনী ভোটাৰ তালিকা সন্দৰ্ভত জিলা আয়ুক্তৰ সংবাদমেল

ডিফু আৰু হাওৰাঘাট নির্বাচনী জিলাৰ ফটোযুক্ত ভোটাৰ তালিকাৰ বিশেষ সংক্ষিপ্ত সংশোধনী ভোটাৰ তালিকা প্রকাশ কৰে কাৰ্বি আংলঙৰ জিলা আয়ুক্ত তথা জিলা নির্বাচনী বিষয়া মধুমিতা ভাগৱতীয়ে । ভোটাৰৰ সংখ্যা বৃদ্ধি ৷

ডিফু, 9 ডিচেম্বৰ: সমগ্র ৰাজ্যৰ লগতে শুকুৰবাৰে কাৰ্বি আংলং জিলাৰ অন্তৰ্গত হাওৰাঘাট আৰু ডিফু নির্বাচনী জিলাৰ বাবে বিশেষ সংক্ষিপ্ত সংশোধনী ফটোযুক্ত ভোটাৰ তালিকা প্রকাশ কৰা হয় । কালি ডিফুস্থিত কার্বি আংলং জিলা প্রশাসনৰ কাৰ্যালয়ৰ সম্মিলন কক্ষত এক সংবাদমেলৰ আয়োজন কৰি এই কথা সদৰী কৰে জিলা আয়ুক্ত তথা জিলা নির্বাচনী বিষয়া মধুমিতা ভাগৱতীয়ে । নির্বাচনী বিষয়াগৰাকীয়ে সদৰী কৰা অনুসৰি হাওৰাঘাট আৰু ডিফু নির্বাচনী জিলাত মুঠ ভোটাৰৰ সংখ্যা 5,53,165 গৰাকী । হাওৰাঘাট সমষ্টিত মুঠ ভোটাৰৰ সংখ্যা 1,57,545 গৰাকী, ডিফু সমষ্টিত 2,40,944 গৰাকী আৰু বোকাজানত 1,54,676 গৰাকী ভোটাৰ । মুঠ ভোটাৰৰ বৃদ্ধিৰ সংখ্যা 50,051 গৰাকী ।

ভোটাৰৰ বৃদ্ধিৰ হাৰ প্রায় 10 শতাংশ । সমষ্টি পুনঃনির্ধাৰণ প্রক্রিয়াৰ পিছত পূব কার্বি আংলং জিলাত 651 টা ভোট কেন্দ্র হৈছে । ইয়াৰে বোকাজানত 203 টা, হাওৰাঘাটত 222 টা আৰু ডিফুত 226 টা । মুঠ 13 টা ভোট কেন্দ্র বৃদ্ধি পাইছে । আনহাতে, সমষ্টি পুনৰ নির্ধাৰণ প্রক্রিয়াৰ বাবে বোকাজান সমষ্টিক 108, হাওৰাঘাট 109 আৰু ডিফুক 110 নম্বৰ সমষ্টিৰে নামাকৰণ কৰা হৈছে । ডিফু লোকসভা সমষ্টিটোক 6 নম্বৰ ডিফু অনুসূচীত জাতি লোকসভা সমষ্টি হিচাপে নামাকৰণ কৰা হৈছে ।

8 ডিচেম্বৰৰ পৰা 8 জানুৱাৰীলৈকে ওজৰ-আপত্তিসমূহ গ্রহণ কৰা হ'ব বুলি জিলা আয়ুক্তগৰাকীয়ে জনায় । ইয়াৰোপৰি ভোটাৰ অনলাইন এপ https:// voters.eci.in/portal or Eronet in officeৰ যোগেদি প্ৰ-পত্ৰ পূৰণ কৰিব পাৰিব বুলি জানিব পৰা গৈছে । আনহাতে, তৃতীয় লিংগ ভোটাৰৰ সংখ্যা 19 গৰাকী বুলি সংবাদমেল যোগে সদৰী কৰা হয় । ইয়াৰোপৰি জিলাখনত যদি যৌন কর্মী আছে তেওঁলোকৰো ভোটাৰ তালিকাত নাম সন্নিৱিষ্ট কৰিবলৈ আহ্বান জনাইছে নির্বাচনী বিষয়াগৰাকীয়ে ।

সংবাদমেলখনৰ পূর্বে জিলাখনৰ বিভিন্ন ৰাজনৈতিক দলৰ প্রতিনিধিসকলৰ সৈতে প্রকাশ পোৱা বিশেষ সংক্ষিপ্ত সংশোধনী ফটোযুক্ত ভোটাৰ তালিকা সন্দর্ভত এক বৈঠকত মিলিত হয় নির্বাচনী বিষয়াগৰাকী । সংবাদমেলখনত জিলা নির্বাচনী বিষয়া মধুমিতা ভাগৱতী, নির্বাচনী বিষয়া ব্রুহিদ ৰাভা আৰু অতিৰিক্ত উপায়ুক্ত ডেভিদ কুমাৰ বৰা উপস্থিত থাকে ৷

লগতে পঢ়ক:ধেমাজিত দুটা সমষ্টিৰ ফটোযুক্ত খচৰা ভোটাৰ তালিকা প্ৰকাশ