ডিফুত শ্বহীদৰ পৰিয়ালক পাৱাৰটিলাৰ আৰু চেক বিতৰণ

বৃহস্পতিবাৰে ডিফুত জনজাতি হিতাধিকাৰীৰ মাজত পাৱাৰটিলাৰ আৰু স্বৰাজ্যৰ বাবে আন্দোলনত জড়িত শ্বহীদ পৰিয়ালৰ মাজত ৫ লাখ টকাৰ চেক প্ৰদান কৰা হয় ৷ কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং আৰু সাংসদ হৰেণছিং বে'ই অনুষ্ঠানত অংশগ্ৰহণ কৰে ৷

ডিফু, ২ জানুৱাৰীঃকাৰ্বি আংলং স্বায়ত্ত শাসিত পৰিষদৰ উদ্যোগত বৃহস্পতিবাৰে ডিফুত জনজাতি হিতাধিকাৰীৰ মাজত পাৱাৰটিলাৰ আৰু স্বৰাজ্যৰ বাবে আন্দোলনত জড়িত শ্বহীদ পৰিয়ালক ৫ লাখ টকাৰ চেক বিতৰণ কৰা হয় ৷ ডিফু আৰবেৰটাম আৰু ক্ৰাফ্ট চেণ্টাৰৰ প্ৰেক্ষাগৃহত পাৱাৰ টিলাৰ আৰু চেকসমূহ আনুষ্ঠানিক ভাৱে প্ৰদান কৰে কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং আৰু সাংসদ হৰেণছিং বে'ই ৷

ডিফুত জনজাতি হিতাধিকাৰীক পাৱাৰটিলাৰ, শ্বহীদক ৫ লাখকৈ চেক বিতৰণ

অনুষ্ঠানত পৰিষদৰ কেইবাগৰাকী ইএম, এমএচি আৰু সচিব উপস্থিত থাকে ৷ ভাষণ প্ৰসংগত সাংসদ হৰেণছিং বে'ই কয় যে, নিজৰ অধিকাৰ সাব্যস্ত কৰিবলৈ আন্দোলনকাৰী সকলে গণতান্ত্ৰিক আৰু অহিংসা আন্দোলনৰ আশ্ৰয় লৈহে আন্দোলন কৰিব লাগে ৷ ইয়াৰোপৰি পাৱাৰটিলাৰ বিতৰণ সন্দৰ্ভত সাংসদ গৰাকীয়ে কয়, কাৰ্বি আংলঙৰ উৰ্বৰা ভূমি ভগৱানৰ দান ৷ সেয়ে খেতিয়কসকলে এই আঁচনিৰ জৰিয়তে ৰাজ সাহাৰ্য যুক্ত পাৱাৰটিলাৰ লাভ কৰি জিলাখনত কৰ্ম সংস্কৃতি গঢ়ি তুলিবলৈ সক্ষম হ'ব ৷

আনহাতে, কাৰ্বি আংলং স্বায়ত্ত শাসিত পৰিষদৰ মুখ্যকাৰ্যবাহী সদস্য তুলিৰাম ৰংহাঙে কয় যে, কাৰ্বি আংলং স্বায়ত্ত শাসিত পৰিষদৰ উদ্যোগত বৃহস্পতিবাৰে জিলাখনৰ ৬০ গৰাকী হিতাধিকাৰীক এককালীন বিশেষ গ্ৰাণ্টৰ জৰিয়তে পাৱাৰটিলাৰসমূহ বিতৰণ কৰা হয় ৷ পাৱাৰটিলাৰ সমূহৰ বাবে পৰিষদে ৮০ শতাংশ মূল্য বহন কৰিব, হিতাধিকাৰীয়ে ২০ শতাংশ মূল্য বহন কৰিয়েই এই পাৱাৰটিলাৰ পাবলৈ সক্ষম হৈছে ৷ এখন পাৱাৰটিলাৰৰ মূল্য ১,৭৮,৪৪৩'০০ টকা, তাৰ ভিতৰত হিতাধিকাৰীয়ে মাত্ৰ ৩৫,৭১০'০০ টকাহে বহন কৰিব লাগিব ৷ তাৰোপৰি জিলাখনৰ স্বায়ত্ত ৰাজ্যৰ আন্দোলনত জপিয়াই পৰি শ্বহীদ হোৱা ব্যক্তিসকলৰ প্ৰতি সন্মান জনাই কাৰ্বি স্বায়ত্ত শাসিত পৰিষদে এককালীন বিশেষ সাহাৰ্যৰ জৰিয়তে জিলাখনৰ ২০০ পৰিয়ালক ৫ লাখ টকাকৈ মুঠ ১০ কোটি টকাৰ সাহাৰ্য আগবঢ়োৱা হৈছে বুলি মন্তব্য কৰে ৷