কাৰ্বি আংলঙত আৰক্ষীৰ বিষয়ে ধন দাবীৰ অভিযোগ

মাঞ্জা আৰক্ষীৰ বিৰুদ্ধে উত্থাপিত হৈছে ধন দাবীৰ অভিযোগ ৷ শুকুৰবাৰে এই সন্দৰ্ভত এক সংবাদমেলৰ আয়োজন কৰে জিলাখনৰ বালি মহলদাৰ আৰু চাপ্লায়াৰ এছ’চিয়েছনে ৷

ডিফু,১০ জানুৱাৰীঃ কাৰ্বি আংলং জিলাৰ মাঞ্জা আৰক্ষীৰ বিৰুদ্ধে উত্থাপিত হৈছে ধন দাবীৰ অভিযোগ ৷ শুকুৰবাৰে এই সন্দৰ্ভত এক সংবাদমেলৰ আয়োজন কৰে জিলাখনৰ বালি মহলদাৰ আৰু চাপ্লায়াৰ এছ’চিয়েছনে ৷ সংগঠনটোৱে সংবাদমেলযোগে স্থানীয় আৰক্ষীয়ে ধন দাবী কৰা সন্দৰ্ভত অভিযোগ উত্থাপন কৰে ৷

অভিযোগ অনুসৰি, কিছুদিনপূৰ্বে মাঞ্জা আৰক্ষীৰ এটা দলে আচম্বিতে সন্থাৰ কাৰ্যালয়ত প্ৰৱেশ কৰি উপস্থিত কৰ্মচাৰীসকলক বিনা কাৰণত মাৰধৰ কৰে ৷ লগতে আৰক্ষীয়ে বিভিন্ন সময়ত বালি ব্যৱসায়ীসকলৰ পৰা ধন দাবী কৰি অহাৰ অভিযোগ তুলি সন্থাই উক্ত কাৰ্যৰ প্ৰতিবাদস্বৰূপে তিনিদিনলৈ বালি সৰবৰাহ বন্ধ ৰখাৰ কথা ঘোষণা কৰিছে ৷

ঘটনা সন্দৰ্ভত স্থানীয় আৰক্ষী চকীৰ ভাৰপ্ৰাপ্ত বিষয়া গৰাকীয়ে জনোৱা মতে, একাংশ লোকে উক্ত স্থানত প্ৰতিখন ট্ৰাকৰ পৰা দুহাজাৰ টকাকৈ সংগ্ৰহ কৰা প্ৰত্যক্ষ কৰে ৷ বিষয়া গৰাকীৰ উপস্থিতিৰ উমান পাই অবৈধভাৱে ধন সংগ্ৰহ কৰা আৰক্ষীকেইজনে পলায়ন কৰে ৷ ঘটনাতো সন্দৰ্ভত বিষয়া গৰাকীয়ে ঊৰ্ধতম কৰ্তৃপক্ষক অৱগত কৰাৰ লগতে এক গোচৰো ৰুজু কৰা বুলি সংবাদ মাধ্যমক জানিবলৈ দিছে ৷

লগতে চাওকঃখেলো ইণ্ডিয়া, 2020 ত অসমৰ হৈ উপাসাৰ প্ৰথমটো পদক দখল