ডিফু, ৬ মে': সদ্য সমাপ্ত বিধানসভা নিৰ্বাচনত বিপুল ভোটত জয়লাভ কৰা কাৰ্বি আংলং জিলাৰ চাৰি গৰাকী বিধায়কক উষ্ম আদৰণি আৰু অভিনন্দন জ্ঞাপন কৰিছে কাৰ্বি আংলং জিলাৰ বড়ো ৰাইজৰ হৈ জিলা বড়ো অগ্ৰণী সংগঠনৰ নেতৃবৃন্দই । বৃহস্পতিবাৰে লাংহিন নগৰস্থিত কাৰ্বি আংলং জিলাৰ প্ৰাক্তন বি এল টি কল্যাণ পৰিষদৰ কাৰ্যালয়ত জিলা বড়ো অগ্ৰণী সংগঠনৰ নেতৃবৃন্দৰ এক সভাৰ জৰিয়তে বিজেপি দলৰ হৈ ১৭ নং বোকাজান বিধানসভা সমষ্টিৰ পৰা ডা:নোমল মমিন, ১৮ নং হাওৰাঘাট বিধানসভা সমষ্টিৰ পৰা দৰছিং ৰংহাং, ১৯ নং ডিফু বিধানসভা সমষ্টিৰ পৰা বিদ্যাছিং ইংলেং আৰু ২০ নং বৈঠালাংছ' বিধানসভা সমষ্টিৰ পৰা বিপুল ভোটত জয়লাভ কৰা ৰূপছিং টেৰণক অভিনন্দন জ্ঞাপন কৰা হয় ।
উল্লেখযোগ্য যে, কাৰ্বি আংলং জিলাত বসবাস কৰা সমগ্ৰ বড়ো ৰাইজে এই বৰ্ষৰ বিধানসভা নিৰ্বাচনত বিজেপি দলৰ প্ৰাৰ্থিক পূৰ্ণ সমৰ্থন আগবঢ়াইছিল । তাৰোপৰি বি টি আৰৰ বিজয়ী বিজেপি বিধায়ক সকলকো অভিনন্দন জ্ঞাপন কৰে বড়ো অগ্ৰণী সংগঠনৰ নেতৃবৃন্দই । অন্যহাতে সাংবাদিকৰে হোৱা এক বাৰ্তালাপত ৰাজ্যত কৰ'ণা মহামাৰীৰ বাবে বিধায়ক সকলৰ কাষত গৈ আদৰণি জনোৱাৰ পৰা বঞ্চিত হ'বলগীয়া হোৱাত দুখ প্ৰকাশ কৰে অগ্ৰণী সংগঠন সমূহৰ হৈ কাৰ্বি আংলং জিলা কছাৰী সমাজৰ সভাপতি দালছিং বসুমতাৰীয়ে ।