ৰঙিয়া, 25 আগষ্ট : ৰঙিয়াৰ উদিয়ানা নিবাসী যুৱক এজন বহিঃৰাজ্যত বিগত তিনিদিনৰ পৰাই নিৰুদ্দেশ হৈ আছে (Youth from Rangia missing for many days) । খবৰ অনুসৰি, তামিলনাডুৰ পৰা অসমলৈ অহাৰ পথত নিৰুদ্দেশ হোৱা যুৱকজনৰ নাম আখতাৰ হুছেইন (22) । এই ঘটনাক কেন্দ্ৰ কৰি অঞ্চলটোত সৃষ্টি হয় এক হাহাকাৰময় পৰিস্থিতি ৷
তথ্য অনুসৰি, তামিলনাডুৰ আনন্দ নগৰৰ ব্যক্তিগত কোম্পানীত কৰ্মৰত ৰঙিয়াৰ যুৱকজনে সোমবাৰে নগাঁও এক্সপ্ৰেছৰ জৰিয়তে ৰঙিয়াস্থিত নিজ বাসগৃহলৈ উভতিবলৈ ৰাওনা হয় । কিন্তু সোমবাৰে বিয়লি আখতাৰ হুছেইনৰ ম’বাইল ফোনেৰে কোনোবা অচিনাকি হিন্দীভাষী লোকে ঘৰলৈ ফোন কৰি নিজকে ৰে’ল আৰক্ষী বুলি পৰিচয় দি পৰিয়ালৰ লোকক 1600 টকা দিবলৈ কয় ।
আখতাৰৰ ঘৰলৈ ফোন কৰা লোকজনে যুৱকজনৰ লগত ধপাঁত উদ্ধাৰ হোৱা বুলি উল্লেখ কৰি জৰিমনাৰ বাবদ 1600 টকা দিব লাগিব বুলি জনাইছিল পৰিয়ালৰ লোকক । লগতে বাৰকোডৰ জড়িয়তে সোনকালে 1600 টকা আদায় দিবলৈ তাগিদা দিছিল । ইফালে পৰিয়ালৰ লোকে এদিন পিছত 1600 টকা যোগাৰ কৰি অচিনাকি লোকজনে দিয়া বাৰকোডৰ জড়িয়তে টকাখিনি অনলাইন যোগে পঠিয়াই দিয়ে ।