মহাবিদ্যালয় কৰ্তৃপক্ষৰ মনোমালিন্য : দুই ছাত্ৰ - ছাত্ৰীক নিলম্বন

ছয়গাঁও মহাবিদ্যালয় কৰ্তৃপক্ষই নিলম্বিত কৰিছে দুজনকৈ ছাত্ৰ - ছাত্ৰীক । 'বেক' বা 75 শতাংশ উপস্থিতি নাথাকিলে ছাত্ৰ - ছাত্ৰীসকলক বিনামূলীয়া নামভৰ্তিৰ পৰা বঞ্চিত কৰাৰ জাননী জাৰি কৰাৰ পাছতে দুই ছাত্ৰ - ছাত্ৰীয়ে আন্দোলন কৰাৰ পাছতে এই নিলম্বন কৰা হয় ।

ছয়গাঁও, ৫ জুলাই : দৰিদ্ৰ ছাত্ৰ - ছাত্ৰীক বিনাচৰ্তে নামভৰ্তিৰ ব্যৱস্থা কৰাৰ দাবীত আন্দোলন কৰাৰ বাবেই ছয়গাঁও মহাবিদ্যালয়ৰ দুগৰাকী ছাত্ৰ - ছাত্ৰীক মহাবিদ্যালয় কৰ্তৃপক্ষই নিলম্বিত কৰে । মহাবিদ্যালয়ৰ অনুশাসন ভংগ আৰু মহাবিদ্যালয় বিৰোধী কাম কৰাৰ অভিযোগত এই দুই ছাত্ৰ - ছাত্ৰীক বহিস্কাৰ কৰা হয় । 29 মে'ত শিক্ষা সঞ্চালকালয়ে প্ৰকাশ কৰা 'চাৰ্কুলাৰ' অনুসৰি 'বেক' বা 75 শতাংশ উপস্থিতি নাথাকিলে ছাত্ৰ - ছাত্ৰীসকলক বিনামূলীয়া নামভৰ্তিৰ পৰা বঞ্চিত কৰাৰ জাননী জাৰি কৰিছিল । সেই জাননীৰ বিৰোধিতা কৰিবলৈ গৈ নিলম্বিত হ'ব লগা হ'ল দুই ছাত্ৰ - ছাত্ৰী ক্ৰমে চন্দন দাস আৰু উপাসনা দাস ।

এই ঘটনাৰ পাছতে তেওঁলোকে অভিযোগ কৰা অনুসৰি, সম্পূৰ্ণ গণতান্ত্ৰিকভাৱে ছাত্ৰ অধিকাৰৰ বাবে কৰা আন্দোলনক মহাবিদ্যালয় বিৰোধী আখ্যা দি কোনো আলোচনা নকৰাকৈ নিলম্বন কৰাৰ বাবে তেওঁলোকৰ শিক্ষাগত জীৱনলৈ ভাবুকি আহিছে । এই ঘটনা সংঘটিত হোৱাৰ পাছতে দুই ছাত্ৰ - ছাত্ৰীৰ কাষত থিয় দিছে এছ এফ আইৰ ৰাজ্যিক কমিটি । দুই ছাত্ৰ - ছাত্ৰীৰ বিৰুদ্ধে থকা অভিযোগ উঠাই নল'লে অধ্যক্ষৰ বিৰুদ্ধে তীব্ৰ আন্দোলন গঢ়াৰ হুংকাৰ দিছে এছ এফ আইৰ সদস্য সকলে ।