কামৰূপ, ২ ফেব্ৰুৱাৰীঃ বিগত ২৮ জানুৱাৰীত দক্ষিণ কামৰূপৰ ছয়গাঁও গুমীত সংঘটিত হত্যাকাণ্ডৰ সৈতে জৰিত দুই অভিযুক্তক অৱশেষত গ্ৰেপ্তাৰ কৰে আৰক্ষীয়ে। ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া ভাস্কৰমল্ল পাটোৱাৰীৰ নেতৃত্বত শুকুৰবাৰে নিশা চলোৱা অভিযানত ছয়গাঁৱৰ হাতীপাৰা অঞ্চলৰ পৰা জালাল আলী আৰু মতিউৰ আলীক গ্ৰেপ্তাৰ কৰে আৰক্ষীয়ে।
দুৰ্ধৰ্ষ ডকাইত আনছেৰ আলী ওৰফে বগাৰ ব্যক্তিগত শত্ৰুতাৰ বাবেই সংঘটিত কৰিছিল গুমীৰ চাঞ্চল্যকৰ হত্যাকাণ্ডটো । ইপিনে হত্যাকাণ্ডৰ মূল অভিযুক্ত আনছেৰ আলী ওৰফে বগা এতিয়াও পলাতক অৱস্থাত ৷
উল্লেখ্য যে ২৮ জানুৱাৰীৰ নিশা শুই থকা অৱস্থাত দুৰ্বৃত্তৰ দলটোৱে হানি খুঁচি হত্যা কৰিছিল আছিৰুদ্দিন আহমেদৰ লগতে পত্নী ইয়াতন খাতুনক আৰু ৫ বছৰীয়া পুত্ৰ সন্তানক । কণমানি কুৰবান আলীৰ সন্ধান বৰ্তমানলৈ উলিয়াব পৰা নাই আৰক্ষীয়ে । বিছনাৰ তলত লুকাই থকাত দুৰ্বৃত্তৰ হাতৰ পৰা কথমপিহে প্ৰাণ ৰক্ষা পৰিছিল দম্পত্তিটোৰ কন্যা শিশুটিৰ ।