আৰক্ষীৰ জালত দুৰ্ধৰ্ষ টিক্লা আৰু জহা

ৰঙিয়া আৰক্ষীয়ে অভিযান চলায় আটক কৰিছে দুটা দুৰ্ধৰ্ষ ডকাইত ৷ ৰেকিব আলী ওৰফে টিক্লা আৰু আৰিফুল ইছলাম ওৰফে জহা নামৰ ডকাইত দুটাই দীৰ্ঘদিন ধৰি নিদ্ৰা হৰণ কৰিছিল আৰক্ষীৰ ৷

ৰঙিয়া,22 জানুৱাৰী : ৰঙিয়া আৰক্ষীৰ জালত দুৰ্ধৰ্ষ ডকাইত ৷ দীৰ্ঘদিন ধৰি ৰঙিয়া অঞ্চলত ডকাইতি, ধন লুট আদি ঘটনাৰে ত্ৰাস সৃষ্টি কৰি আহিছিল আৰক্ষীৰ ম’ষ্ট ৱান্টেড ৰেকিব আলী ওৰফে টিক্লাই ৷ ৰেকিবৰ লগতে আৰক্ষীয়ে আটক কৰিছে আৰিফুল ইছলাম ওৰফে জহা নামৰ আন এটা ডকাইতকো ৷ আটকাধীন দুই ডকাইতৰ ঘৰ ৰঙিয়াৰ শ’লমাৰীত ৷

গোপন সূত্ৰ ভিত্তিত আৰক্ষীয়ে অভিযান চলায় আটক কৰে দুয়োকে ৷ আৰক্ষীৰ অভিযান কালত এটা দুমহলীয়া অট্টালিকাৰ পৰা জঁপিয়াই পলায়নৰ চেষ্টা চলাইছিল টিক্লাই ৷ কিন্তু গুৰুতৰভাৱে আহত হয় ডকাইতটো ৷ বৰ্তমান গুৱাহাটী চিকিৎসা মহাবিদ্যালয়ত ভৰ্তি কৰোৱা হৈছে টিক্লাক ৷ দীৰ্ঘদিন ধৰি এই দুই ডকাইতে কামৰূপ আৰু বাক্সা জিলাৰ ভিন্ন প্ৰান্তত ডকাইতি কৰি আহিছিল ৷

লগতে পঢ়ক :ৰাইজৰ দল আৰু AJPক মহাজোঁটৰ অংশীদাৰ হ’বলৈ আহ্বান বদৰুদ্দিনৰ