1 বজাৰ দহটা গুৰুত্বপূৰ্ণ খবৰ...

1 বজাৰ দহটা গুৰুত্বপূৰ্ণ খবৰ...

ৰণজিৎ দাস, ফণী শৰ্মা, দিলীপ শইকীয়াক দিল্লীলৈ জৰুৰী তলব নাড্ডাৰ । দলীয় প্ৰাৰ্থিত্ব আৰু অগপৰে আসন বুজাবুজিৰ সন্দৰ্ভত বৈঠকত মিলিত হোৱাৰ ধাৰণা ।

২২ ফেব্ৰুৱাৰীত প্ৰধানমন্ত্ৰী মোডীয়ে আনুষ্ঠানিকভাৱে কুলাজান চিতলমাৰীত হ’বলগীয়া বিশাল জনসভাৰ পৰাই ডিজিটেল মাধ্যমেৰে উদ্বোধন কৰিব বহু প্ৰতীক্ষিত ধেমাজি অভিযান্ত্ৰিক মহাবিদ্যালয় ৷ ইতিমধ্যে মহাবিদ্যালয়খনত 160 গৰাকী শিক্ষাৰ্থীয়ে অনলাইনযোগে শিক্ষাগ্ৰহণ কৰি আছে ৷

দেওবাৰে ডিব্ৰুগড়ৰ বকপাৰাত এটা নাহৰফুটুকী পিঞ্জৰাবদ্ধ হয় ৷ দীৰ্ঘদিন ধৰি দাঁতিকাষৰীয়া অঞ্চলত উপদ্ৰৱ চলাই আহিছিল নাহৰফুটুকীটোৱে ৷

শনিবাৰে শদিয়াৰ বিজেপি নেত্ৰী ৰুবী মণি বৰুৱাৰ নেতৃত্বত শান্তিপুৰৰ পৰা ধলালৈকে উলিওৱা বাইক ৰেলীত অংশগ্ৰহণৰ বাবে গৈছিল জ্যেষ্ঠ বিজেপি কৰ্মী ঔম প্ৰকাশ উপাধ্যায় ৷ সেই সময়তেই কোনো দুৰ্বৃত্তই তেওঁক ফোনযোগে গুলিৱাই মৰাৰ ভাবুকি প্ৰদান কৰে ৷

দিল্লী, মহাৰাষ্ট্ৰ, কেৰালাকে ধৰি দেশৰ কেইবাখনো ৰাজ্যত মহামাৰী ক'ভিডৰ দ্বিতীয় ঢৌ আৰম্ভ হোৱাত সন্ত্ৰস্ত হৈ উঠিছে অসম চৰকাৰ । আসন্ন বিপদৰ উমান পাই শনিবাৰে মুখ্য সচিব জিষ্ণু বৰুৱাই জাৰি কৰে এক নতুন সতৰ্কতামূলক নিৰ্দেশনা ।

কেৱল ভোটৰ বাবেই এতিয়া বিজেপিয়ে প্ৰলোভনৰ ৰাজনীতি কৰিছে ৷ দলটোৱে নানান আঁচনিৰ জৰিয়তে ৰাইজক প্ৰলোভিত কৰিছে ৷ কিন্তু এই কথা এতিয়া অসমৰ ৰাইজে বুজি উঠিছে বুলি উল্লেখ কৰে বিধায়ক দেৱব্ৰত শইকীয়াই ।

শনিবাৰে মাজুলীৰ অফলামুখ তথা দক্ষিণপাট অঞ্চলৰ খহনীয়াগ্ৰস্ত লোকসকলৰ লগতে জেংৰাইমুখ আৰু মাজৰদেউৰীতো অনুষ্ঠিত কৰা হৈছে কংগ্ৰেছৰ অসম বচাও কাৰ্যসূচী ৷ এই কাৰ্যসূচীত অংশগ্ৰহণ কৰে কংগ্ৰেছৰ নিৰ্বাচন প্ৰচাৰ কমিটিৰ অধ্যক্ষ, সাংসদ প্ৰদ্যুৎ বৰদলৈ, বিহপুৰীয়া সমষ্টিৰ প্ৰাক্তন বিধায়ক ভূপেন বৰাসহ কংগ্ৰেছৰ বহু সদস্য ৷

ত্ৰিপুৰা ট্ৰাইবেল এৰিয়া অট'নমাছ ডিষ্ট্ৰিক্ট কাউন্সিল (টিটিএএডিচি) ৰ নিৰ্বাচনৰ বাবে স্পৰ্শকাতৰ নিৰ্বাচন কেন্দ্ৰসমূহত উপযুক্ত সুৰক্ষা ব্যৱস্থা গ্ৰহণ কৰাৰ দাবী উত্থাপন কৰিছে ত্ৰিপুৰা বিজেপিয়ে ৷ ত্ৰিপুৰা ট্ৰাইবেল এৰিয়া অট'নমাছ ডিষ্ট্ৰিক্ট কাউন্সিলৰ অধীনত মুঠ 1,244 টা নিৰ্বাচন কেন্দ্ৰ আছে ৷ প্ৰায় 8 লাখ 64 হাজাৰ ভোটাৰে টিটিএএডিচি ৰ নিৰ্বাচনত ভোটাধিকাৰ সাব্যস্ত কৰিব ৷ 23 ফেব্ৰুৱাৰীত প্ৰকাশ পাব ভোটাৰৰ চূড়ান্ত তালিকা ৷

শুকুৰবাৰে আৰক্ষীয়ে প্ৰায় ৯০ গ্ৰাম কোকেনৰ সৈতে বিজেপি যুৱ ফ্ৰণ্টৰ নেতা পামেলি স্বামী, তেওঁৰ সহযোগী আৰু দেহৰক্ষীক গ্ৰেপ্তাৰ কৰিছিল। তেতিয়াৰ পৰাই আৰম্ভ হৈছিল এক ৰাজনৈতিক চাপ ।

আলফা(স্বাঃ)ৰ দ্বাৰা অপহৃত QUIPPO ৰ দুই বিষয়াক মানবীয়তাৰ খাতিৰত মুক্তি দিবলৈ পৰেশ বৰুৱাক আহ্বান জনালে ৰাজ্যৰ মুখ্যমন্ত্ৰী সৰ্বানন্দ সোণোৱালে ৷ আলফাৃ(স্বাঃ)ৰ সেনাধ্যক্ষ পৰেশ বৰুৱাক আলোচনাৰ মাজলৈ অহাৰো আহ্বান জনাইছে সোণোৱালে ৷