গৰুভৰ্তি বাহন ৰখোৱাৰ বাবেই বাইহাটাত মহিলাৰ বাহনত আক্ৰমণ

কামৰূপ জিলাৰ বাইহাটা চাৰিআলিত গৰুভৰ্তি বাহন ৰখোৱাক কেন্দ্ৰ কৰি উত্তেজনা (Tension over stopping of cattle loaded vehicles)। মান্দাকাটাস্থিত ধ্যান ফাউণ্ডেচন গোশালাৰ স্বত্বাধিকাৰী গায়ত্ৰী কাপুৰৰ বাহন আক্ৰমণ । আৰক্ষী ঘটনাস্থলীত উপস্থিত হৈ গৰুসহ বাহন জব্দ কৰে ।

বাইহাটা চাৰিআলি,৩০ জুন :ৰাজ্যত গৰু চিণ্ডিকেট চক্ৰ এতিয়াও সক্ৰিয় হৈ আছে (Cattle syndicate in Assam)। প্ৰায় প্ৰতিদিনে ৰাজ্যৰ ভিন্ন প্ৰান্তত চোৰাংকৈ সৰবৰাহ কৰা গৰু জব্দ কৰিছে আৰক্ষীয়ে । ইয়াৰ পাছতো গৰু চিণ্ডিকেট চক্ৰই এই কাৰ্যকলাপ অব্যাহত ৰাখিছে । গৰুৰ চোৰাং সৰবৰাহৰ বাবে বিভিন্ন ধৰণৰ উপায় অৱলম্বন কৰিছে চক্ৰটোৱে । ইফালে অসমৰ মাজেৰে বাংলাদেশ আৰু বহিঃৰাজ্যলৈও এই চক্ৰটোৱে গৰু সৰবৰাহ অব্যাহত ৰাখিছে ।

ইয়াৰ মাজতে কামৰূপ জিলাৰ বাইহাটা চাৰিআলিত গৰু সৰবৰাহক লৈ এক উত্তপ্ত পৰিস্থিতিৰ সৃষ্টি হয় । গৰুভৰ্তি বাহন ৰখাই বিপদত পৰিল এগৰাকী মহিলা (Woman in danger after stopping a vehicle full of cows)। একাংশ লোকে মহিলাগৰাকীৰ বাহন আক্ৰমণ কৰাত অধিক উত্তপ্ত হৈ পৰে পৰিৱেশ ।

ঘটনাটো বাইহাটা চাৰিআলিৰ সমীপৰ বেজেৰা-উত্তৰ গুৱাহাটী সংযোগী পথত সংঘটিত হৈছে । ভুক্তভোগী মহিলাগৰাকী হৈছে মান্দাকাটাত থকা ধ্যান ফাউণ্ডেচন নামৰ গোশালাখনৰ স্বত্বাধিকাৰী গায়ত্ৰী কাপুৰ । গায়ত্ৰী কাপুৰে জনোৱা মতে গৰুভৰ্তি এখন বাহন প্ৰত্যক্ষ কৰাৰ পাছতে তেওঁ বাহনখন ৰখাই আৰক্ষীক খবৰ দিয়ে । অভিযোগ অনুসৰি AS-25-DC-6166 নম্বৰৰ বাহনখনত অতি বিপদজনকভাৱে ৭টাকৈ গৰু সৰবৰাহ কৰা হৈছিল ।

কিন্তু আৰক্ষীক খবৰ দিয়াৰ পাছতে একাংশ লোকে তেওঁ উভতি ধৰে । গৰুভৰ্তি বাহনখন গায়ত্ৰী কাপুৰে আক্ৰোশমূলকভাৱে জব্দ কৰাৰ অভিযোগ তুলি লোকসকলে তেওঁৰ ব্যক্তিগত বাহনখনত আক্ৰমণ কৰে (Group of people attacked a vehicle in Baihata Chariali)। যাৰ ফলত গায়ত্ৰী কাপুৰৰ বাহনখনৰ বিস্তৰ ক্ষতি হয় । শিল-ইটা নিক্ষেপ কৰি বাহনখনৰ গ্লাছবোৰ ভাঙি পেলাই উত্তেজিত লোকসকলে ।

অৱশ্যে পৰৱৰ্তী সময়ত বাইহাটা চাৰিআলিৰ আৰক্ষী ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰিবলৈ সক্ষম হয় । গৰুসহ বাহনখন জব্দ কৰে আৰক্ষীয়ে (Cattle seized in Baihata Chariali)। লগতে গায়ত্ৰী কাপুৰৰ বাহনখনো আৰক্ষীয়ে উদ্ধাৰ কৰে । ইফালে সমগ্ৰ ঘটনা সন্দৰ্ভত গোশালাৰ স্বত্বাধিকাৰী গায়ত্ৰী কাপুৰে বাইহাটা আৰক্ষী থানাত এক গোচৰ ৰুজু কৰে ।

লগতে পঢ়ক :চেল্ফি উঠি ব্যৱসায়ীৰ মোবাইল লৈ উধাও গ্ৰাহকৰূপী চোৰ